Media
Saçların vaxtından tez ağarması insanları yaşlı göstərən əsas səbəblərdəndir. Bunun qarşısını almaq üçün isə ən çox istifadə etdiyimiz üsullardan biri də saç boyasıdır. Lakin bir sıra şəxslər var ki, həmin boyaların tərkibində olan kimyəvi maddələrdən çəkindiyi üçün təbii yollar axtarmağa başlayır. Bəs saçların gənc yaşda ağarmasının qarşısını hansı yollarla almaq mümkündür?
1) Kalsium tərkibli qidalarla bəslənmək
Gündəlik həyatımızda kalsium tərkibli qidalardan istifadə etmək sümük və əzələlərin inkişafını təmin etməklə yanaşı, həm də saçlarımızın ağarmaması üçün bir növ qalxan rolunu oynayır.
2) Stresdən uzaq dayanmaq
Qayğı və stres səhhətimizə ən çox təsir edən amillərdən sayılır. Hətta bir çox sağlıq məsələlərinin önündə duran əsas problem də elə məhz stresdir. Həmin amil eyni zamanda saçlarımıza da mənfi təsir göstərir. Stresin həm həyatımıza, həm də saçlarımıza vurduğu ziyanın qarşısını almaq üçün atılan ilk addım onu idarə etməyi bacarmaqdır. Rahatlamaq üçün müxtəlif meditasiya üsullarını sınamaq məqsədəuyğundur.
3) Tərkibində keyfiyyətli protein ehtiva edən məhsullarla qidalanmaq
Sağlam bədənə sahib olmaq üçün balanslaşdırılmış qidalanma da çox vacibdir. Keyfiyyətli zülal qəbulunu artırmaqla saç, dırnaq və dərinizin əvvəlkindən daha sağlam görünməsi mümkündür. Pəhrizinizə ət, süd və yumurta kimi zülalla zəngin qidaları daxil edərək ağarmış saçlara “dayan” deyə bilərsiniz.
4) Bədəndəki dəmir depolarını doldurmaq
Saçlar erkən yaşda ağarmağa başlayıbsa, bu, dəmir çatışmazlığının göstəricisi ola bilər. Dəmir qan hüceyrələrinin oksigeni bütün bədənə daşımasında mühüm rol oynayır. Sağlamlığa birbaşa təsir edən bu məsələ nəzarət altına alınmazsa, immunitetin zəifləməsinə və bir çox xəstəliklərin yaranmasına gətirib çıxara bilir.
Dəmir ehtiyatını nəzarət altında saxlamaq üçün qida rasionuna qırmızı ətin daxil edilməsi faydalıdır. Vegetarianlar C vitamini ilə zəngin qidalar qəbul edərək bu problemdən qaça bilərlər.
Tərkibində C vitamini olan qidalar və içkilər bədəndə dəmirin sorulmasını artırır. Xüsusilə dəmir qaynağınız bitki mənşəlidirsə, C vitamini qəbul etdiyiniz dəmirin vücudunuz tərəfindən daha asan sorulmasını və depolanmasını təmin edir.
Bu nüanslara diqqət etsəniz, cavan yaşda qocalmaqdan qurtula bilərsiniz.
Aytac Şahin
Medianews.az
