Media
Rusiya-Ukrayna müharibəsinin 33-cü günə girdiyi bir vaxtda Rusiyanın Xarici İşlər naziri Lavrov iki ölkə arasında aparılan sülh danışıqları ilə bağlı açıqlama verib.
Medianews.az xəbər verir ki, Rusiyanın Xarici İşlər naziri Sergey Lavrov bildirib ki, Ukrayna ilə əsas məsələlərdə razılığa gəldikdən sonra Rusiya prezidenti Vladimir Putin və Ukrayna lideri Vladimir Zelenski masa arxasında əyləşməlidirlər.
Serbiya mətbuatına açıqlama verən Lavrov, Putin və Zelenskinin indiki mərhələdə masa arxasına oturmasının konstruktiv addım olmayacağını və danışıqlara zərər verəcəyini bildirib.
Lavrov açıqlamasında həmçinin onu da bəyan edib ki, Rusiya-Çin münasibətləri həmişəkindən daha güclüdür.
Xatırladaq ki, Kremldən verilən açıqlamada hazırda Putin-Zelenski sammitində irəliləyiş olmadığı qeyd edilib. Kremlin sözçüsü Dmitri Peskov isə Rusiya ilə Ukrayna arasında sülh danışıqlarının sabah Türkiyədə keçiriləcəyini bəyan edib.
Peskov həmçinin bildirib ki, Ukraynada əsir götürülən rus əsgərlərinə işgəncə verilməsi ilə bağlı iddialar araşdırılır. Kremlin açıqlamasında ABŞ prezidenti Co Baydenin Putinin postunda qala bilməyəcəyi ilə bağlı dediyi sözlərin də narahatlığa səbəb olduğu bildirilib.
Qeyd edək ki, Reuters-ə danışan Türkiyə rəsmilərindən biri isə danışıqların bu gün keçiriləcəyi bildirsə də, danışıqlar aparan nümayəndə heyətlərinin bu gün Türkiyəyə gəlməsinin mümkün görünmədiyini açıqlayıb.
Leyla
Medianews.az
