Diqqət! “Birbank” bloklanır!

“Diqqət! Android smartfonuna virus daşıyıcısı olan "crack" proqramlar yükləyənlərdə “Birbank” tətbiqi bloklanır. Buna səbəb "WhatsApp+", başqalarının bağlı profillərinə baxmaq üçün əlavələr və pullu xidmətləri pulsuz təqdim edən "apk" fayllardır. Belə fayllar cihazlarda arxa planda casusluq edir”. Medianews.az bildirir ki, belə bir xəbərdarlıqla “Technote Media” şirkətinin təsisçisi, jurnalist, texnobloger Fərid Pərdəşünas çıxış edib. Medianews.az-a açıqlamasında F.Pərdəşünas deyib ki, sözügedən proqramlar vasitəsilə cihaza yoluxdurulmuş zərərli fayllar bank tətbiqlərinin məlumatlarını götürür və nəticədə vəsait oğurlanır: “Ona görə də smartfonuna bu kimi tətbiqləri yükləyənlərin “Birbank” hesabı bloklanır ki, bank hesablarını qorumaq mümkün olsun. Vətəndaşlardan bir daha xahiş olunur ki, bu mövzuda məsuliyyətli davransınlar və Android ekosisteminə kənar tətbiqləri yükləməkdən çəkinsinlər. Bu onları birbaşa təhlükəyə atır. Xüsusilə də evdə uşaqların "crack" oyunlar yüklədiyi çox sayda cihaz var. Diqqətli olaq ki, hesablarımızda olan vəsaitləri qurban verməyək. Bu çox ciddi və yayılmış məsələdir”. Fərid Pərdəşünas zaman-zaman texnoloji savadlılıq və kibertəhlükəsizlik mövzularında ictimai çıxışlar edir. Toğrul Əli, Medianews.az