Xəbər verdiyimiz kimi, Azərbaycanda 9 mərtəbədən hündür yaşayış binalarının tikintisinin dayandırılması nəzərdən keçirilir.
Hazırlanacaq plana əsasən, ölkə ərazisində hündürmərtəbəli binalar tikilməyəcək.
Məsələ ilə bağlı Medianews.az – a danışan əmlak eksperti Ramin Osmanlı bildirib ki, hazırlanacaq plan təqdirəlayiq bir addımdır:
“Lakin paytaxtın mərkəzində bina tikmək üçün yer qalmayıb. Paytaxtın mərkəzi o qədər yüklənib ki, boş yerlər məhdudur.
Sürüşmə zonalarında isə tikinti ümumiyyətlə dayandırılmalıdır. Seysmik cəhətdən bir qədər aktiv ərazilərdə mümkün qədər tikintiyə icazə verilməməlidir.
Bu planı söküntü və şəhərsalma işləri həyata keçiriləcək ərazilərdə tətbiq etmək olar.
İnanmıram ki, 9 mərtəbəli binaların tikilməsini Bakı şəhərinin 12 rayonunda tətbiq etmək mümkün olsun. Bu proses mövcud sıxlıq əmsalları ilə əlavə yüklənməyə gətirib çıxara bilər. Çünki binanın hündürlüyü azaldıqca əlavə tikiləcək binaların sayı çoxalacaq ki, bu da sıxlığa səbəb olacaq.
Təbii ki, mərtəbələrin sayının çox olması tikinti şirkətləri üçün daha sərfəlidir. Mərtəbə sayının az olması isə xərcləri artırır. Çünki bir binanın bünövrəsinin başa gəlməsi daha çox xərc tələb edir.
Ona görə tikinti şirkətləri də daha hündür binaların tikintisinə maraqlıdırlar ki, əlavə gəlir əldə etsinlər”.
Mehin Mehmanqızı
Medianews.az