“Daxili bazarı təhciz etməkdə çətinliklər, idxal inhisarçılığı, fantastik qiymətlər və məhsul qıtlığı Rusiyadan idxal asılılığından xilas olan bilməyən ölkələrin iqtisadi mənzərəsi olacaq”.
Medianews.az xəbər verir ki, bu barədə iqtisadçı-ekspert Eldəniz Əmirov bildirib.
O qeyd edib ki, sanksiyalar neft emalı zavodlarında xarici avadanlıq və komponentlərin çatışmazlığı səbəbindən təmir işlərini çətinləşdirir: “Rəsmi Moskva benzin ixracına qadağa tətbiq etdiyi 25 fevral tarixində bunun səbəbinin Rusiyaya tətbiq edilən sanksiyalar olduğuna dair yazmış və müsahibələr vermişdik. Dünən isə Forbes jurnalında Rusiyanın Energetika və Maliyyə İnstitutunun sözçüsü Sergey Kondratyev Rusiyanın neft emalı sənayesi yay aylarında Rusiyada benzin qıtlığına səbəb ola biləcək ciddi problemlərlə üzləşəcəyini yazıb. Onun sözlərinə görə, sanksiyalar neft emalı zavodlarında xarici avadanlıq və komponentlərin çatışmazlığı səbəbindən təmir işlərini çətinləşdirir. Böyük ehtimal ki, S.Kondratyevi bu etiraflara görə bağışlamayacaqlar. Halbuki, o hələ yumşaq ifadələr seçmişdi”.
İqtisadçının qənaətincə, Rusiyada təkcə neft deyil, bütün emal və istehsal sahələri getdikcə tənəzzüllə üzləşəcək: “Hər emal və istehsalın arxasında xaricdən idxal edilən çiplər, yüksək texnoloji avadanlıqlar, yarımkeçiricilər və digər müxtəlif kompanentlər dayanır. Odur ki, Rusiyadan idxal asılılığı olan ölkələr də bunun mənfi tərəfini getdikcə daha çox hiss edəcəklər. Hansı ölkələr ki, bu problemi fürsətə çevirməyi bacaracaqlar, Rusiyadan asılılığı daxili emal və istehsal gücü hesabına azaldacaqlar, o ölkələr ciddi anlamda qazanacaqlar”.
E.Əmirov deyib ki, Rusiyadan olan asılılığı yalnız başqa ölkələr hesabına ödəməyi düşünən, öz istehsal və emal sənayesinə diqqət ayırmayan ölkələr üçün nəinki idxal problemi əbədi qalacaq, hətta onlar bir gün daha ciddi və dərin böhran yaşayacaqlar: “Daxili bazarı təhciz etməkdə çətinliklər, idxal inhisarçılığı, fantastik qiymətlər və məhsul qıtlığı Rusiyadan idxal asılılığından xilas olan bilməyən ölkələrin iqtisadi mənzərəsi olacaq”.
Turan ORUC