MediaNovruz bayramı türk xalqlarının tarixi adət-ənənələrini özündə ehtiva edən qədim və əsas bayramlardan sayılır. Digər xalqlar kimi azərbaycanlılarda bu bayramı böyük həvəs və sevinclə qarşılayır. Novruz ab-havası isə ən çox paytaxt Bakıda hiss olunur.
Şəhərə həm yerli, həm də xarici turist axını var. Hər kəs əylənir və bayramın dadını çıxarır. Sanki bu günlərdə hava da insanların üzünə gülümsəyir. Günəş göydən boylanaraq öz parıltısı ilə ətrafa gözəllik qatır. Baharın gəlişi isə sözün əsl mənasında hiss olunur.
Dənizkənarı milli park və içərişəhər ərazisində yaradılan şərait bura gələn bütün insanların könlünü oxşayır. Novruz atributları səməni, yumurta, tonqal, baharqızı heykəlləri və bunun kimi şəhərində mərkəzində bir çox fiqurlar quraşdırılıb.
İnsanlar bayram günlərində bura gələrək həm istirahət etməklə, həm də əylənməklə vaxtlarını xoş keçirirlər.
Novruz bayramı böyüklərdən daha çox uşaqları sevindirir. Onlar bu bayramı böyük sevinclə qarşılayır. Valideynləri ilə gəzintiyə çıxan körpələr milli-mənəvi dəyərlərimizi əks etdirən Novruz adətləri ilə tanış olur, bayrama özəl quraşdırılan atributlarla şəkil çəkdirir və bayramın dadını çıxarırlar.
Böyüklü-kiçikli hər kəs burada bayramı qeyd edir. Hamı bir-birilə mehribandır. Musiqi sədaları dörd-bir yanı bürüyüb. Şəhər əhalisi yazın gəlişini böyük çoşğuyla qarşılayır. Kimi rəqs edir, kimi şəkil, video çəkərək bu anları ölümsüzləşdirir, kimi də ailəvi istirahətdən zövq alır.
Aytac Şahin
Medianews.az
