Ötən gün UEFA Konfrans Liqasının pley-off mərhələsinin cavab oyununda “Qarabağ” Belçikanın “Gent” klubu ilə qarşılaşıb. Bakıda keçirilən görüşdə Ağdam təmsilçisi, Belçikadakı görüşdə isə rəqib 1:0 hesabı ilə qalib gəlib. Penaltilər seriyasında üstün olan “Gent” növbəti mərhələyə adlayan tərəf olub.
“Qarabağ”ın və Azərbaycan millisinin sabiq yarımmüdafiəçisi Aslan Kərimov Fanat.Az-a açıqlamasında “köhlən atlar”ın çıxışını dəyərləndirib:
“Üzücü oyun oldu. Məğlubiyyətə səbəb olan bir neçə amil var. Bir neçə həlledici məqam var ki, hər biri ayrı-ayrılıqda məğlubiyyətə təsir edib.
İlk məsələ zədələr idi. Mərkəzdə Marko Yankoviçin olmaması, üstəlik Qara Qarayevin də xəstələnməsi bir təsirdir. Sözün düzü, Qaranın yerinə Riçard Almeydanı görəndə təəccübləndim. Fikirləşdim ki, meydana niyə Qaranı yox, Riçard buraxılıb. Adətən Riçard oyun qurucusudur. Biz isə “Gent”lə oyunda daha çox müdafiə olunmalıydıq.
Daha sonra televiziyadan eşitdim ki, Qaranın qızdırması olub deyə oyunu buraxıb. Bundan sonra ediləcək bir yol yox idi. Məğlubiyyətə səbəblərdən biri budur.
İkinci səbəb odur ki, rəqibin hücumlarına qarşı müdafiəmiz hazır deyildi. Öndə sıxmaq istəyirdik. Amma rəqib bizim cinahları rahatlıqla yara bildi. Cinahlari bağlaya bilmədik. Bir tərəfdə Abdulla Zubir, digər tərəfdə Ramil Şeydayev idi və hər ikisi gecikirdilər. Mərkəzdəki müdafiəçi və yarımmüdafiəçilər cinahları sığortalaya bilmirdilər. Rəqib cinahlarımızı yardığı üçün komanda yavaş-yavaş geri çəkilirdi. Belə olan halda isə rəqib üstünlüyü ələ keçirirdi.
Üçüncü səbəb bizim topa nəzarət edə bilməməyimiz oldu. Oyunçular bir-birilərini yaxşı başa düşmürdülər. Hələ ki, lazım olan ustalıq səviyyəsinə gəlib çatmayıblar. Qış fasiləsindən əvvəl komanda tam formalaşmışdı, bir-birilərini yaxşı tanıyırdılar. Düzdür, o heyətdən sadəcə iki futbolçu çıxıb. Amma onlar həlledici oyunçular idilər. Gələnlər isə onları əvəz edə bilmədilər.
Bütün bu səbəblərə baxmayaraq oyunu udmaq mümkün idi. Hücumda biraz dişsiz olmağımız təsir etdi. Belə görüşlərdə qol vurmaq lazımdır. Amma standart vəziyyətlər istinasna olmaqla bizim 100 faizli qol imkanımız olmadı. Bunun isə səbəbini bilmirəm. Kənardan baxıb fikir bildirmək asanddır, amma yenə də istənilən halda taktiki gedişlərimiz var. Rəqib “5”li oynayırdı və bizim necə hücum edəcəyimizi açıq-aşkar bilirdilər. Ən təhlükəli yerlərimiz cinahlar idi. Ramil Şeydayev boşluq olduğu hallardan çox yaxşı istifadə edərdi, Zubir isə təkbətək qaldığı halda rəqibi geridə qoya bilirdi. Bu oyunda Zubiri cinahda rəqiblə təkbətək görə bilmədim. Cəmi bir epizodda keçdi, onda da ötürmə zəif alındı. Digər epizodlarda artıq 2-3 nəfər vəziyyəti sığortalayırdı. Zubir nəsə etmək istəyəndə isə alınmırdı və geri qayıdıb Elvin Cəfərquliyevə pas verirdi. Rəqib sözün əsl mənasında cinahları bağlamışdı.
Mərkəzdən də yaxşı istifadə edə bilmədik. Bir-birini başa düşmək saniyə içində baş verən haldır. Belə anlarda oyunçular bir-birilərini gərək baxışla anlasınlar. Çünki belə anda sözlə çatdırmaq olmur. Məsələn, bu anlayış yox idi. Zaman-zaman olurdu. Ama belə mötəbər oyunda zaman-zaman olması kifayət etmir.
Bu matçda qalib gələcəyimizə əmin idim. Amma “Gent” sözü əsl mənasında məni təəccübləndirdi. Məğlubiyyətin digər səbəblərindən biri də rəqibin baş məşqçisinin doğru strategiya qurması idi. Komandasına baxsaq, “Gent” bəzən elə səhvlər edirdi ki, deyirsən Belçika çempionatının komandasıdır budur? Durduq yerdə top rəqibə keçirdi, 14-15 yaşlı uşaqların səhvini edirdilər. Amma bəzən də elə oyun nümayiş etdirirdilər ki, “Qarabağ”ın oyunçularını 3 pasa geridə qoyurdular. Müdafiə xətti məcbur qalıb geriyə çəkilirdi ki, komanda yoldaşlarının dəstəyi gəlib çatsın. Oyunun əvvəlində “Gent” daha çox səhvlər etdi. Amma sonra səhvləri minimuma endirib üstünlüyü ələ keçirdilər. İkinci hissədə “Qarabağ”ı qapısına sıxışdırıb qol vurdular. Penalti 50-50-ə olan şeydir. Uşaq futbolçular penaltiyə hazır idilər. Hər biri də əla penalti vurdu. Mandrajda olaraq vurulan penalti deyildi. Sadəcə olaraq rəqibin qapıçısı komandasını xilas elədi, amma bizim qapıçı xilas edə bilmədi.
Bu görüş “Qarabağ”ın avrokuboklarda gördüyüm ən zəif oyunlarından biri idi. Düzdür, nəsə etməyə çalışırdıq, amma qol imkanları yarada bilmədik. “Qarabağ”ın fəlsəfəsi topa sahib olmaqdır. Əgər bu göstərici 45-55-dirsə, demək sən istədiyinin 50 faizini yerinə yetirə bilmirsən. Hər halda bu səhvləri düzəltməyə çalışacaqlar. Ondan sonra işlərini yaxşılaşdıra bilərlər”.