Azərbaycanda karantin elan edilə bilər

“Azərbaycanda koronavirusa yoluxma daha da arta bilər”.

Bunu Medianews-a Tibb Universitetinin dosenti, tanınmış doktor Rəşid Mahmudov söyləyib. O, yoluxma sayında artım müşahidə olunacağı təqdirdə karantin elan ediləcəyini vuğulayıb:

“Hazırda dünyada yoluxma sayında artım müşahidə olunur. Xüsusilə, Çində koronavirusa yoluxma həddən artıq çoxalıb. Orada artıq karantin tətbiq edilib. Bu göstəricilərə əsasən söyləmək olar ki, Azərbaycanda da artım müşahidə oluna bilər”.

Doktor koronavirusun meymunçiçəyindən daha təhlükəli xəstəlik olduğunu bildirib:

“Meymunçiçəyi kifayət qədər qorxulu xəstəlikdir. Bu infeksiya əvvəllər də mövcud olub. 1983-cü ildə demək olar ki, yoxa çıxmışdı. Lakin Konqoda 50 mindən çox meymun bu xəstəliyin daşıyıcıları idi. Onları da Ümumdünya Səhiyyə Təşkilatı nəzarətdə saxlayıb. Amma necə oldusa, yenidən yayılmağa başladı. Statistika göstərir ki, gənclər bu xəstəliyə daha çox yoluxur. Çünki yaşlılar zamanında meymunçiçəyinə qarşı peyvənd olunublar. Gənclərin isə immuniteti bu infeksiyaya qarşı dayanıqlı deyil”.

Xanlar Əlibəy
Medianews.az