“Parlamentdə maaşların qaldırılması məsələsi müzakirə olunur. Ümumiyyətlə maaşların qaldırılması heç zaman neqativ dəyərləndirilməməlidir. Amma ilk növbədə daha az təminatlı təbəqələrin məvacibləri, maaşları, təqaüdləri artırılmalıdır. Daha sonra dövlət idarəetməsində təmsil olunan şəxslərin”.
Bu sözləri Medianews.az-a deputatların maaşının artırılması haqqında danışan Ağ Partiya sədri Tural Abbaslı bildirib. Müsahibimizin sözlərinə görə, əgər sadə vətəndaşın da əməkhaqqı qaldırılsa, onun etiraz etməyə səbəbi olmaz:
“Parlament üzvü 5000-6000 manat məvacib alanda müəllim, həkim də heç olmasa 1500-2000, hərbiçi 2500-3000 manat əməkhaqqı almalıdır. O zaman heç kim parlament üzvünün niyə 6000-7000 manat maaş almasını sorğulamaz. Amma bizdə minimum əməkhaqqı 300 manat olduğu təqdirdə ombudsman 3000 manat maaş alanda, spikerin 10.000-ə yaxın məvacib ala biləcəyi məsələsi olanda təbii ki, insanlarda qıcıq yaranacaq”.
Tural Abbaslı bildirdi ki, maaşların artırılması üçün hər cür şərait var:
“Biz hər kəsin maaşlarının, təqüdlərinin artırılmasının tərəfdarıyıq ki, insanlarımız yaxşı yaşasın. Düşünürük ki, bununla bağlı kifayət qədər iqtisadi əsaslar da, gəlirlər də var. Neftin, qazın qiymətinin yüksək olması ona imkan yaradır. İnflyasiya məsələlərini də tənzimləmək olar. Görünən odur ki, hakimiyyət bu sahədə də digər sahələrdə olduğu kimi maraqlı görünmür”.
Partiya sədri qeyd etdi ki, dünyada da bahalaşma olsa da, bizə çata bilməz:
“Ümumiyyətlə dünyada qiymət artımı tendensiyası var. Bizdə onsuz da qiymətlər yüksəkdir. Bu tendensiyanı da bəhanə edib qiymətləri iki qat artırırlar. Dolayısıyla biz qiymət artımı məsələsində dünyadan iki addım öndə gedirik. Dünya hələ indi-indi məhsulları bizim keçən il aldığımız qiymətə alır. Biz bu məsələlərdə onlardan xeyli qabaqdayıq. Amma maaş məsələsində arxadayıq”.
Zərif Ülvizadə
Medianews.az