Media
Mərakeşin Azərbaycandakı səfiri Məhəmməd Adil Embarş ilə Afrika günündə görüşdük.
Medianews.az-a danışan səfir Afrika günündə foto sərgi keçirmək qərarına gəldiyini və Afrikanın maraqlı təbiətini nümayiş etdirməyin məmnunluğundan danışdı:
– Belə bir ideya haradan qaynaqlandı? –
25 May Afrika günüdür. İstədik ki, ilk dəfə insanların daha çox gəldiyi, çoxluq təşkil edilən bir məkanda, Mall-da təşkil edək. Əsas məqsədimiz daha çox insanları sərgiyə cəlb etmək, onları Afrikanın tarixi və mədəniyyəti ilə daha yaxından tanış edə bilməkdir. Hesab edirəm ki, sərgidə nümayiş olunan fotolarda siz Afrika ilə qiyabi də olsa tanış olmaq imkanı əldə edəcəksiniz.
– Azərbaycan və Mərakeş mədəniyyəti arasında hansı oxşar və fərqli cəhətlər var?
– Azərbaycan maraqlı təbiətə, infrastruktura, mədəniyyətə sahibdir. Azərbaycanla oxşar və fərqli cəhətlərimiz var. Əvvəla onu qeyd edim ki, həm mərakeşlilər, həm də azərbaycanlılar mədəniyyəti çox sevirlər. Ümumiyyətlə, mədəniyyət millətlər arasında körpü rolunu oynayır, onları bir-birinə yaxın edir.
Coğrafi şəraitinə görə Mərakeş və Azərbaycan bir-birindən çox uzaq məsafədə yerləşsə də tarix, mədəniyyət, siyasi baxımından yaxın ölkələrdir. Hər dəfə hansısa tədbir təşkil edərkən məqsədimiz bu olur ki, iki dövləti bir-birinə daha da yaxın edək, aradakı mədəniyyət körpülərini inkişaf etdirək. Hər iki ölkə multikultural dəyərlərə çox böyük önəm verir.
Bu günlərdə çay festivalında iştirak etdik. Həmin festivalda müşahidə etdik ki, mərakeşlilər kimi azərbaycanlılar da çayı çox sevir. Siyasi baxımdan da Mərakeş və Azərbaycanın oxşar cəhətləri, region problemləri var. Bu baxımdan iki ölkənin bir-birinə dəstəyi çox vacibdir.
Onu da qeyd edim ki, Azərbaycan və Mərakeş arasında mədəni əlaqələrin inkişafı ilə bağlı sazişimiz var.
Mərakeşdə bu günlərdə musiqi festivalı keçiriləcək və Azərbaycandan olan muğam ifaçıları da həmin festivalda iştirak edəcəklər.
– Muğamı bəyənirsinizmi?
– Əlbəttə. Sizin gözəl musiqiləriniz mövcuddur. Musiqilərinizin fərqli ahəngi var”.
Xəyalə Rəis
Medianews.az
