“Ciddi iqtisadi çətinliklər məngənəsinə salınan qardaş Türkiyə Cümhuriyyəti özünün dövlət ağlı və milli iradəsi sayəsində daha bir təhlükədən yayınmağı, kritik mərhələni məharətlə keçməyi bacardı”.
Medianews.az xəbər verir ki, bu barədə politoloq Elxan Şükürlü bildirib.
O qeyd edib ki, 2023-cü ilin mayındakı prezident və parlament seçkilərində hakim partiyanın öz qələbəsini təmin etmək üçün saxtalaşdırmaya gedəcəyini, siyasi baxımdan iki qütbə bölünmüş Türkiyə cəmiyyətində qarşıdurma, kütləvi iğtişaşlar yaranacağını, beləliklə də, Ərdoğan hökumətinin ciddi nüfuz itkisinə məruz qalacağını, daxildən sarsılacağını, yenidən Qərbdən asılı hala düşəcəyini gözləyən dairələr bu dəfə eyni əhvalla 31 martdakı bələdiyyə seçkilərinə köklənmişdilər.
Politoloqun sözlərinə görə, 2023-cü ilin 14-28 mayında olduğu kimi, 2024-cü ilin 31 martında da Türkiyənin dövlət ağlı proseslərin dinc, ağrısız, siyasi təlatümsüz və xaricilərin deyil, ölkənin öz ssenarisinə uyğun keçməsini uğurla təmin edə bildi: “Hakim partiyanın Türkiyənin İstanbul, Ankara, İzmir kimi böyük şəhərlərində öz namizədlərinin qələbəsini təmin etmək üçün hər hansı əyri yollara əl atmaması, halal və dürüst seçki keçirməsi, Türkiyə xalqının da ABŞ və Avropanın özünə nümunə olacaq seçki mədəniyyəti ortaya qoyması, hər şeydən əvvəl, son illər Rəsəb Tayyib Ərdoğanın “islamçı diktator”, “avtoritar lider” obrazını yaradan, Türkiyənin də demokratiyaya hazır olmadığını iddia edərək, nəinki Avropa İttifaqından, hətta Baydenin “demokratiya sammitləri”ndən belə uzaq tutmağa çalışan bütün Qərb təbliğatını tamamilə ifşa və alt-üst etmiş oldu”.
E.Şükürlü vurğulayıb ki, CHP-nin bələdiyyə seçkilərindəki uğurunu Qərbin Türkiyəni yenidən tamamilə öz çətiri altına qaytaracağı kimi dünən gecədən sosial şəbəkələrdə başladılmış nikbin notlu təbliğatın da o dərəcədə əsası yoxdur: “Türkiyənin mövcud hakimiyyəti üçün ən kritik dönəm məhz 2023-2024-cü illər, xüsusən də bu dönəmdə keçiriləcək prezident, parlament və bələdiyyə seçkiləri sayılırdı. Türkiyə artıq onun üçün “böhran situasiyası” yaradacaq bu mərhələni dünəndən etibarən geridə buraxaraq, artıq sabit bir mərhələyə qədəm qoyur. Böyük şəhər bələdiyyələrinin əksəriyyətinin rəqiblərinin nəzarətinə keçməsinə baxmayaraq, həm prezident postu, həm də parlamentdə üstünlük Ərdoğanın komandasındadır. Bu hal imkan verəcək ki, Ərdoğan hakimiyyəti bundan sonra daha cəsarətlə həm ölkənin Qərbdən asılı olmayan xarici siyasət kursunu, həm də seçkinin üzə çıxardığı daxili problemlərin həlli istiqamətində daha fəal şəkildə “yenidənyüklənmə”ni həyata keçirsin”.
Lamiyə MİRZƏYEVA