Media
Türkiyədə baş verən dəhşətli zəlzələlərdən sonra yeni təhlükələri qabaqlamaq üçün addımlar atılır.
Cebhe.info xəbər verir ki, qardaş ölkədə yoluxucu xəstəliklərə qarşı mübarizəyə başlanılıb.
Belə ki, evləri dağılan insanların müvəqqəti yerləşdiyi yerlərdə yoluxucu xəstəliklərin yayılma ehtimalı çox yüksək qiymətləndirilir.
Türkiyənin səhiyyə naziri Fahrettin Koca da bununla bağlı açıqlama verib.
O, bütün lazımi tədbirlərin görüldüyünü diqqətə çatdırıb:
“Epidemiyanın meydana gəlməsi zəlzələ bölgəsində ciddi problemlərə yol aça bilər. İlk növbədə, suyun təmizliyi xalq sağlamlığının əsas şərtlərindən biridir. Nazirliyimiz tərəfindən magistral suların getdiyi yerlər də daxil olmaqla 1181 nöqtədə monitorinq aparılıb. Fəlakət bölgəsində mümkün yoluxucu xəstəliklərlə bağlı risklər artıq erkən xəbərdarlıq sisteminin qurulması ilə nəzarət altındadır. Sarılıq, qrip kimi xəstəliklər də gündəlik olaraq izlənilir. 1483 nəfərdə səpgili xəstəliklər, 61 880 nəfərdə isə qripə bənzər xəstəliklər aşkar edilib və onların müalicəsinə başlanılıb. Bu risk deyil, çünki onların müalicəsinə artıq başlanılıb”.
Nazir vurğulayıb ki, tetanus xəstəliyinə qarşı lazımi peyvəndlər edilir:
“İnsanların qəlblərindəki dağıntıları bilmək mümkün deyil. Bu şəhərlərin əhalisi bir travma yaşayır və ruhları zədələnib. Amma bu kədərli günlərdə yaşanan sevinclərdən də danışmaq istəyirəm. Fəlakət bölgəsində 6 447 körpə doğulub. Onlara cansağlığı və uzun ömür arzulayıram”.
