“Varlı qadın” Mingəçevir Dövlət Dram Teatrına gəlir

Mingəçevir Dövlət Dram Teatrında yeni tamaşa hazırlanır.

Teatrın mətbuat xidmətindən verilən məlumata görə tamaşada yazıçı-dramaturq Əli Əmirlinin zəngin səhnə əsəri olan “Varlı qadın” tragikomediyasına müraciət olunub.

Əsər 1999-cu ildə yazılıb və müxtəlif zamanlarda teatrların repertuarında tamaşaya qoyularaq, böyük uğur qazanıb. Hazırlanan yeni tamaşa  aktyor-rejissorun Mingəçevir Dövlət Dram Teatrında ərsəyə gətirdiyi sayca 3-cüdür. Əsərin mövzusu isə tərbiyəvi, mənəvi əhəmiyyət daşıyır. Burada ailənin sevgi üzərində qurularaq yaşamağın vacibliyi və cəmiyyətdə boşanmalara yox deməyi tamaşaçılara çatdırmağa çalışılacaq. Komediya ilə yanaşı, təsiredici və düşündürücü dramatik stiuasiyalar da öz əksini tapıb.

Qeyd edək ki, səhnə əsərinin quruluşçu rejissoru Azərbaycan Respublikasının Xalq artisti Valeh Kərimovdur.  Valeh Kərimov əsərin quruluşçu rejissoru olmaqla yanaşı, həm də tamaşada əsas qəhrəman obrazı olan “Sarı” rolunu ifa edəcək. Tamaşada həmçinin teatrın direktoru, respublikanın Əməkdar artisti İntiqam Soltan “Vəkil” obrazını ifa edəcək. Onlarla dublyor kimi respublikanın Əməkdar artisti Şıxı Yaqubov və tanınmış aktyor Aydın Quliyev çıxış edəcək. Tamaşada Bakıdan dəvət edilmiş daha bir komediya ustası – Natiq Fərzəliyev də iştirak edəcək. Səhnə əsərində teatrın aktyorlarından Könül Hacıyeva, Məlahət Ağayeva, Asim Məmmədov, Firuz Hacıyev, Nargilə Abdullayeva, Aytən İsmayılova, Paşa Salmanov, həmçinin gənc həvəskar aktyorlarımız Cavidan Abdullayev, Rəvan Adil iştirak edəcək.
Yeni tamaşanın quruluşçu rəssamı Əməkdar rəssam Rafael Həşimovdur.

Tamaşanın hazırlıq məşqlərinə artıq başlanılıb və fevral ayının sonunda teatrsevərlərin ixtiyarına təqdim olunacağı gözlənilir.