Media
Son dövrlər orta təhsil müəssisələrində yaşanan xoşagəlməz hadisələr gündəmə daha çox yansıyır. Artıq şagirdlərin telefonun kamerasına çəkib, sosial şəbəkələrə sızdırdığı videolar adi hal almağa başlayıb. Elə buna bənzər bir hadisə keçən gün 59 nömrəli tam orta məktəbdə yaşanmış və hər kəsin dilinə düşmüşdü.
Belə ki, yayılan videoda şagirdlər üzərində idarəetməni itirən bir qadın müəllimin hövsələdən çıxaraq onlara kobud və qəddarcasına davrandığı görünürdü.
Sözügedən mövzuya münasibət bildirən təhsil eksperti Kamran Əsədov Medianews.az-a açıqlamasında bildirdi ki, bütün bu mənfi hadisələrin səbəbi müvafiq qurumla bağlıdır:
“İlk növbədə qeyd edim ki, hazırda Azərbaycanın 4432 orta ümumtəhsil məktəbində 150 min müəllim fəaliyyət göstərir və həmin müəllimlər öz həyat və sağlamlıqlarını gənclərimizin gələcəyi naminə fəda edirlər. Lakin çox təəssüflər olsun ki, son illər ərzində Elm və Təhsil Nazirliyi məqsədyönlü şəkildə müəllimlərin nüfuzunun aşağı səviyyəyə enib, gözdən düşməsinə çalışır. Bu gün məktəblərdə baş verən bütün neqativ halların günahkarı həmin qurumdur. Bu qurum artıq öz istəyinə nail olub. Son zamanlarda müəllimləri savadsız olaraq göstərmək də müqəddəs peşə sahiblərinin nüfuzunun itməsini sürətləndirən səbəblərdəndir. Əgər bu gün müəllim cəmiyyət qarşısında aşağılanırsa, təbii ki, şagirdlərin də ona hörməti azalır. Bunun nəticəsidir ki, artıq uşaqlar dərslərdə nizam-intizam qaydalarına əməl etmir və məktəbdə, sinif otağında istədikləri kimi davranırlar. Çünki bilirlər ki, bütün hallarda cəzalandırılan və töhmət alan müəllim olur. Hazırda ölkəmizdə təhsil alan 1,6 milyon şagird görür ki, Elm vəTəhsil Nazirliyi öz müəllimlərinin arxasında deyil, onlara heç bir halda dəstək göstərmir. Bütün bunlar təhsilimizdə bir sıra uğursuzluqlara yol açır. Ulu öndər Heydər Əliyev deyirdi ki, mən dünyada müəllimdən yüksək ad tanımıram. Ancaq çox təəssüflər olsun ki, bu gün ölkəmizdə müəllimlərimiz bu qayğını Elm və Təhsil Nazirliyi tərəfindən görə bilmirlər. Sözügedən qurumda fəaliyyət göstərən insanların heç biri bir gün belə orta məktəbdə müəllim olaraq çalışmayıb. Bu səbəbdən də həmin şəxslər müəllimin çəkdiyi əziyyəti təxmin edə və dərdinə şərik ola bilmirlər. Qarşımıza çıxan görüntülər və şahidi olduğumuz hallar artıq onu göstərir ki, bu müqəddəs adı daşıyanlar daha öz vəzifələrindən beziblər”.
Ekspert həmçinin əlavə edib ki, bütün bunlar məktəblərdə tədris səviyyəsinin nə qədər aşağı səviyyədə olduğunun da isbatıdır və bu gün orta təhsil ocaqlarında baş verən hallar heç də xoşa gələn məqam deyil.
Aytac Şahin
Medianews.az
