Media
Bu gün Azərbaycanda kifayət qədər ixtisaslı kadrlar var. Belə olan halda xarici vətəndaşın yüksək maaşla işə cəlb edilməsi və yerli mütəxəssisin az maaşla təmin olunması nə dərəcədə məqsədə uyğundur?
Məsələ ilə bağlı Medianews.az-a danışan Azərbaycan İnsan Resursları Assosiasiyasının İdarə Heyətinin üzvü Saleh Həsənov bildirib ki,
xarici vətəndaşın şirkətə cəlb olunması zamanı həmin prosesin qanunvericilik tərəfinə diqqət etməliyik:
“Çünki hər hansı bir xarici vətəndaşı işə cəlb etmək üçün Dövlət Miqrasiya Xidmətindən icazə istəyirik. Biz bunun üçün həmin quruma müraciət edirik. İcazə verildiyi zaman biz həmin işçini işlə təmin edə bilərik.
Eyni zamanda biz öz fikrimizi əsaslandırmalıyıq ki, nə üçün bizə bu işçi lazımdır? Biz həmin işçini götürməzdən əvvəl nəzərdən keçiririk ki, onun bu ölkədə nə qədər rəqibləri var. Biz onu o zaman cəlb edə bilərik ki, həmin əməkdaşın ixtisasına uyğun Azərbaycanda əməkdaş olmasın və yaxud da az olsun. Biz bu zaman onu cəlb edə bilərik.
Təbii ki, həmin şəxsin əmək haqqı da digərlərindən fərqli olur. Əvvəla, başqa ölkəyə gedən şəxs daha çox əmək haqqı istəyir. Çünki həmin şəxs öz ölkəsini, rahatlığını tərk edir”.
Saleh Həsənov qeyd etdi ki, beynəlxalq sistemdə valyuta ilə hesablanan əmək haqqlarına nəzər salsaq, görərik ki, xarici ölkələrdə təklif olunan məbləğlər Azərbaycandan yüksəkdir:
“Belə olan halda xarici mütəxəssisin, yerli mütəxəssisdən daha çox maaş almaq ehtiyacı yaranır.
Azərbaycandakı əmək haqqı valyuta ilə hesablananda dünyadakı rəqəmlərdən daha aşağı rəqəmlərə gəlib çıxır. Bu normal haldır.
Azərbaycandan xaricə iş məqsədi ilə gedən vətəndaşlar da daha çox əmək haqqı alır. Bütün bu prosesləri normal görmək lazımdır.
Ona görə də öz kadrlarımızdan daha çox xarici vətəndaşların maaşla təmin edilməsi normaldır”.
O bildirib ki, bəzən hər hansı bir şirkətin xarici mütəxəssisin təcrübəsini öz şirkətində tətbiq etmək istəyi olur:
“Yəni xarici vətəndaşın ixtisasına uyğun mütəxəssis ola bilər. Amma tərcübənin və yeniliyin inkişafı üçün şirkət kənardan əməkdaş cəlb etməkdə maraqlı olur.
Təbii ki, bunun subyektiv tərəfləri də olur. Bəzən hər hansı bir inkişaf naminə şirkətlər xaricdən işçi gətirə bilər. Amma bunun ciddi əsaslandırılması lazımdır. Əgər həmin əsaslandırmanı edə bilirlərsə, bu subyektiv tərəfə dönür və həmin vətəndaşa çox maaş vermələri şirkətlərin biznes baxımından doğru olmadığını düşünə bilərik”.
Mehin Mehmanqızı
Medinews.az
