Media
Düşmən təxribatı nəticəsində şəhid olan hərbçilərimizin dəfn mərasimləri zamanı bir qurup şəxsin dəfn ənənəsinə yad olan fikirlər səsləndirməsi və ya hərəkətlər etməsi cəmiyyətin qınağına səbəb olub.
Mövzu ilə bağlı Medianews.az-a açıqlamasında politoloq Yeganə Hacıyeva bildirib ki, şəhidlərimiz üçrəngli bayrağımıza bürünərək dinimizə, əxlaqımıza, uyğun, hörmətlə dəfn edilir: “Bu, bütün dünyada belədir. 20-ci əsrin əvvəllərindən bir sıra dövlətlər, xüsusilə, yaxın Şərqdə, Mərkəzi Asiyada imperiyaların dövründə xüsusi bir törən olub. Bu mərasimlər həm imperatorları öz əsgərləri ilə halallaşma, vida, həm də dünyasını dəyişmiş əsgərlərinin sayını müəyən etmək üçün təşkil edilirdi. Bu mərasimlər cəmiyyəti birləşdirən dəyərlərdir. Biz də azərbaycanlı olaraq dini-mədəni dəyərlərimizi çox gözəl qoruyuruq. Cəmiyyətin, milli-dəyərlərin, dövlətin bütövlüyü, müqəddaratı uğrunda dünyasını dəyişmiş əsgərlərin dəfn mərasimi xüsusi qaydada olmalıdır. Amma təəssüflər olsun ki, son zamanlar dini yaxınlıqdan istifadə edən, şəhidlərimizin dəfn mərasimində yad təbliğatlar aparmaq istəyən qruplar formalaşıb. Son 2 gündə şəhid olmuş hərbçilərimizin dəfn mərasimində anaların fəryadını görürsünüz? “Analar deyir ki, icazə verin şəhid olmuş övladımızı ağlayaq” İslam dininin sübut olunmağa ehtiyacı yoxdur, amma bir şeyi qeyd etmək istəyirəm, 44 günlük Vətən müharibəsini həzm etməyən qonşularımız var.
Və onlar dindən istifadə etməyə çalışırlar. Haradan gəldikləri məlum olmayan bu şəxslər dəfn mərasimini dini təbliğat mərasiminə çevirirlər. Bizim cəmiyyət inamlı, tolerant, hörmətli cəmiyyətdir. Şəhidin dəfnindən tamaşa qurmaq lazım deyil, bu, həm şəhidimizə, həm dəfn mərasiminə gələn insanlara hörmətsizlikdir”.
Ayşən Azadova
Medianews.az
