Son zamanlar gündəm mövsüm meyvələrinin fantastik qiymətləridir. Ən çox danışılansa, gilasın qiymətidir. Hətta deputatlar da deyir ki, onlar da mövsüm meyvələrini ala bilmirlər. Bu qədər fantastik qiymətlərin səbəbi nədir?
Mövzu barədə Medianews.az-a danışan Ağ partiya sədri Tural Abbaslı bildirdi ki, bu məsələ tək mövsüm meyvələrində və giləmeyvələrdə deyil:
“Bahalaşma ümumiyyətlə bütün sahələri əhatə edir. Belə ki, son dönəmlər əhalini ən çox narahat edən məsələlərdəndir. Təəssüflə qeyd etməliyik ki, bu məsələnin həlli istiqamətində hökumətin atdığı konkret addımlar, təkliflər yoxdur. İnsanları öz talelərinin ümidinə buraxıblar”.
Partiya sədri bildirdi ki, qiymətlərin baha olmasının səbəbləri var:
“Əsasən mövsümü meyvələri, giləmeyvələr daha münasib qiymətə olur. Di gəl ki, regionlarla Bakı arasında xeyli fərq var. Əslində kəndli öz məhsulunu birbaşa Bakıda meyvə-tərəvəz bazarına daxil edə bilmir. Mütləq arada dəllallar və vasitəçilər olmalıdır. Buna görə də əlavə dəyər yaranır və qiymət formalaşır. Qiymətin artığını da sadə vətəndaşlar ödəmək məcburiyyətində qalır. Bu da zəif olan alıcılıq qabiliyyətini daha da aşağı salır”.
Tural Abbaslı qeyd etdi ki, fermerlərə məhsullarını sata bilmələri üçün şərait yaradılmalıdır:
“Hökumətdə yarmarkalar deyilən metod düşünülmüşdü. Səhv etmirəmsə indi də var. Düşünürəm ki, mövsümlə bağlı yarmarkaların müddətini uzatmaq, sayını artırmaq olar. Yəni yarmarkaları həftədə bir yox, məsələn iki dəfə etmək olar. Yaxud da meyvə-tərəvəz məsələlərindəki inhisarın üzərinə getmək olar. Kəndli, fermerin öz məhsulunu birbaşa şəhərdə sata bilməsi üçün addımlar atıla bilər. Məhsulların bazara birbaşa gəlməsinə təminat verilə bilər. Təəssüf ki, edilmir, addımlar atılmır və ediləcəyini də düşünmürəm. Çünki marağında olan insanlar var”.
Sədrin sözlərinə görə, meyvə hər kəs üçün lazımlıdır və insanların ala bilməsi üçün şərait yaradılmalıdır:
“Odur ki, şəhər sakinləri meyvə-tərəvəzi bu qədər baha qiymətə alır, yaxud ümumiyyətlə ala bilmir. Ümumi anlamda burada təkcə kiminsə meyvə yeyib, zövqünü oxşamağından söhbət getmir. Hər meyvə, giləmeyvə, tərəvəzdə vitamin var, yəni sağlamlıq məsələsidir. İstər uşaqların formalaşmasında, istər adi vətəndaşların normal həyat tərzi keçirməsi üçün bu vitamin və minerallara ehtiyac var”.
Zərif Ülvizadə
Medianews.az