Bakı-Naxçıvan və Naxçıvan-Bakı istiqamətlərində aviabiletin indiyədək 50 manat olan dəyəri 60 manata qaldırılıb. İnsanlar bu haldan narazıdırlar. Çünki Naxçıvandan Türkiyəyə keçmək imkanları vardı. Hazırda isə quru sərhdələr bağlı, biletlər də bahadır.
Mövzu barədə Medianews.az-a danışan Milli Məclisin deputatı Razi Nurullayev bildirdi ki, Naxçıvana biletlər 10 manat bahalaşıb:
“Yəni 50 manatın üstünə 10 manat əlavə olunub və 60 manat olub. Mən qiymətlərin artırılmasını böyük qəbahət hesab edirəm. Axı Naxçıvan hələ də mühafizə, izolyasiya şəraitindədir. Nə qədər insanlar şikayət edirlər ki, bilet alıb gedə və gələ bilmirik. Əziyyət çəkirlər, növbəyə dayanırlar. Bəzi işbazlar da Naxçıvana bileti 600-1000 manata təklif edir. Bu artıq dözülməz yox, Allahsızlıqdır”.
Millət vəkili qeyd etdi ki, Naxçıvana gediş üçün 50 manat da bahadır:
“Ermənilərin əsarəti və vicdansızlığı səbəbindən onlar 30 ilə yaxındır zülmdə yaşayır, vətənlərinə gedib-gələ bilmirdilər. İndi də təyyarə ilə gəlməyə bilet tapmırlar.Hər kəsin o məbləği verib bileti almağa imkanı da yoxdur. Hətta 50 manat özü də çoxdur. O pulu haradan versin? 50 manat az puldur? Onların gedib-gəlməyə başqa imkanları da yoxdur. Çünki quru sərhədləri bağlıdır. Ona görə də Naxçıvan üçün biletlərin bu şəkildə olması doğru deyil”.
Razi Nurullayevin sözlərinə görə, Naxçıvana uçan təyyarələrin sayı kifayət etmir:
“Hesab edirəm ki, bir çox xərclər dövlətin büdcəsi tərəfindən ödənilməlidir. Belə bir qayda var idi. Ümumiyyətlə təyyarələr azdır. Niyə Naxçıvana əlavə təyyarələr açılmasın? Deyək ki, gündə 5 təyyarə uçur. Qoy 7-10 təyyarə uçsun. Kifayət qədər də təyyarələrimiz var. Milyardlarla dövlət vəsaiti o təyyarələrin alınmasına xərclənilir. Amma təyyarələr artırılmır”.
Zərif Ülvizadə
Medianews.az