Çinin müdafiə naziri Vey Fenhe Tayvanın müstəqilliyini elan edəcəyi təqdirdə Çinin “müharibəyə başlamaqdan çəkinməyəcəyini” söyləyib.
Medianews.az xəbər verir ki, ABŞ müdafiə naziri Lloyd Austin Çini Tayvana qarşı sabitliyi pozan hərəkətləri davam etdirməkdən çəkinməyə çağırıb.
Çinin müdafiə naziri Vey Fenqe və ABŞ-ın müdafiə naziri Lloyd Austin Şanqri-La Dialoq Təhlükəsizlik Sammiti üçün Sinqapurda görüş keçiriblər.
ABŞ müdafiə naziri Lloyd Austin
Çin Müdafiə Nazirliyindən verilən açıqlamaya görə, Vey Fenhe Lloyd Austinə deyib ki, Tayvanın müstəqilliyini elan edəcəyi təqdirdə Çin “müharibəyə başlamaqdan çəkinməyəcək”.
Çin Müdafiə Nazirliyinin sözçüsü Vu Qian bildirib ki, nazir daha sonra xəbərdarlıq edib ki, “Əgər kimsə Tayvanı Çindən ayırmağa cəsarət etsə, Çin ordusu nəyin bahasına olursa olsun, müharibədən çəkinməyəcək”.
Çinin müdafiə naziri Vey Fenhe
Qeyd edək ki, Çin materikdən ayrı bir ada olan və de-fakto idarəsi olan Tayvanı öz ərazisi kimi görür və davamlı olaraq bir gün lazım bildiyi zaman güc tətbiq edərək adayı işğal edəcəyini bildirir.
ABŞ Müdafiə Nazirliyinin görüşlə bağlı verdiyi açıqlamada bunlar qeyd olunub: “Lloyd Austin Tayvan boğazında sülh və sabitliyin vacibliyini və status-kvonun birtərəfli qaydada dəyişdirilməsinə qarşı olduqlarını bir daha təsdiqləyib və Çini Tayvana qarşı sabitliyi pozan hərəkətləri davam etdirməkdən çəkinməyə çağırıb”.
Siyasi statusu ilə bağlı mübahisəsi olan Tayvan gərginliyi son vaxtlar Çin təyyarələrinin adanın hava hücumundan müdafiə zonasına girib-çıxması ilə artıb. Keçən ay Yaponiyaya səfəri zamanı ABŞ prezidenti Co Bayden Çinin hücumu halında Tayvanı hərbi yolla müdafiə edəcəklərini bildirmişdi. Bu da ABŞ-ın illərdir davam etdirdiyi Tayvan siyasətində dəyişiklik demək olacaq.
Medianews.az