İngiltərə kraliçası II. Elizabetin oğlu, Uels şahzadəsi Çarlz Rusiyanın Ukraynadakı müharibəsi səbəbindən ölkələrini tərk etmək məcburiyyətində qalan ukraynalı qaçqınları ziyarət etmək üçün Rumıniyanın paytaxtı Buxarestə gəlib.
“Rumıniya monarxı Marqareta ilə birlikdə Uels şahzadəsi Çarlz Buxarestdəki Romexpo Xeyriyyə Mərkəzinə baş çəkib, bilavasitə Rumıniya hakimiyyətinin, beynəlxalq və yerli təşkilatların Ukraynadakı humanitar böhrana əla reaksiyasını görmək üçün belə bir addım atıb”, – deyə Klarens Hausun bəyanatında deyilir.
Klarens Haus bildirib ki, səfər çərçivəsində şahzadə Çarlz Ukraynadakı müharibədən qaçan ukraynalılarla görüşüb.
Səfəri zamanı tərcüməçi vasitəsilə ukraynalı qaçqınlarla danışan şahzadə Çarlz, “Ukrayna dilimin daha yaxşı olmasını arzulayıram. Biz sizin yaşadıqlarınızı hiss edirik, bu vəziyyət kabusdur”,-deyə bildirib və Ukrayna xalqının cəsarətinə heyran olduğunu söyləyib.
Qeyd edək ki, Birləşmiş Millətlər Təşkilatının (BMT) Qaçqınlar üzrə Ali Komissarlığının (UNHCR) məlumatlarına görə, Avropada ən çox ukraynalı qaçqına ev sahibliyi edən ölkələrdən biri olan Rumıniya, BMT QAK-ın son yeniləməsinə əsasən, 972 min 203 ukraynalı qaçqını qəbul edib.
Leyla, Medianews.az