Media
Azərbaycan Mərkəzi Bankının (AMB) xarici valyuta ehtiyatları növbəti dəfə azalaraq 29 aprel 2022-ci il tarixinə 7 milyard 86 milyon ABŞ dollar təşkil edib.
AMB xəbər verir ki, bu son bir ayda 0.71% və ya 51 mln. dollar azalma deməkdir. Ümumilikdə isə, bu ilin fevral ayından etibarən AMB-nin valyuta ehtiyatlarında 73 mln. dollar azalma baş verib.
İqtisadçı Natiq Cəfərli məsələ ilə bağlı Medianews.az saytına açıqlaması zamanı bildirib ki, bu, nəzərə çarpacaq və təhlükə yaradacaq azalma deyil və texniki koridorlar çərçivəsindədir.
“Aprel ayında valyutaya olan təlabatın artıdığının şahidi olduq. Bəzi hərrac günlərində əvvəlki günlərə nisbətən iki dəfə artıq tələb gəlmişdi. Ona görə də müəyyən azalmaların olması gözlənilən idi. Valyutaya təlabatın artımı bu tendensiyanın davamlı şəkildə gedə bilməsinə işarədir. Amma təhlükəli hədlər deyil. Mərkəzi Bankın ehtiyyatları fonunda 50 mln civarında azalmaların və yaxud artmaların olması ciddi bir təsir göstərmir”.
İqtisadçı bildirir ki, may ayında Mərkəzi Bankın növbəti toplantısı olacaq və o zaman yəqin ki, bununla da bağlı rəsmi açıqlamaların olması gözlənilir.
“Faiz dərəcələri, valyuta ehtiyyatlarının artırılmasına yönəlik addımlarla bağlı Mərkəzi Bankın yeni rəhbərliyinin bir planı olmalıdır. Təəssüf ki, hələki bunu açıqlamayıb. Açıqlasa, biz də mütəxəssislər olaraq, onun üzərindən ictimaiyyətə bilgilər verə bilərik”.
Leyla
Medianews.az
