“Hər yarışdan, qalibiyyətdən sonra mənə çoxlu təbrik mesajları və zəngləri gəlir. Təbii ki, ilk olaraq valideynlərimlə danışıram. İlk sualları da bu olur ki, ağrıyan yerin yoxdur? Onlar mənim bütün əziyyətlərimi görüblər. Sonuncu Olimpiya oyunlarından sonra valideynlərim dedi ki, artıq kifayətdir! Çünki gözümü itirməklə üz-üzə qalmışdım. Məşq etməyə belə icazə vermirdilər. Şükür Allaha hər şey artıq geridə qaldı”.
Sərbəst güləş üzrə 3 qat Dünya və 3 qat Avropa çempionu Hacı Əliyev deyib. O daha sonra cənab prezidentlə görüşündən danışıb.
“Cənab prezidentlə görüş bizim üçün çox sevindirici oldu. Budapeştdə birincilik qazananda düşünürdük ki, görəsən cənab prezident bizi qəbul edəcək ya yox?! Bilirdim ki, cənab prezidentin qarşısında çıxışım var, amma belə bir səmimi dialoqu gözləmirdim. Həqiqətən də mənə çox xoş oldu. Bir daha əmin oldum ki, ölkə başçımız idmana, bizlərə böyük diqqət və qayğı göstərir, bizlərlə yaxından maraqlanır. Təbii ki, bu bizim məsuliyyətimizi daha da artırır. Demək olar ki, bizim komandada digər idmançılardan yaşca böyüyü mənəm. Hamısı gənc güləşçilərimiz idi. Onlar üçün da bu görüş böyük bir stimuldur” deyə Hacı Əliyev bildirib.
O, daha sonra illər öncə Tokioda keçirilən olimpiya oyunlarından danışıb.
“Tokioda keçirilən olimpiya oyunlarında belə bir söz işlətmişdim ki, ola bilsin son olimpiya oyunumdur, amma deməmişdim ki, idmandan, ən əsası da olimpiya oyunlarından uzaqlaşıram. Bu sözü mən televiziyalara deyil, saytlara müsahibəmdə açıqlamışdım. Cənab prezidentin bundan xəbəri var idi. O vurğuladı ki, yaxşı ki, idmanda qalmısan, getməmisən. Ölkə başçısı qeyd etdi ki, siz artıq bizim çempionumuzsunuz. 2017-ci ildə 3-cü dəfə dünya çempionu oldum. O vaxt da cənab prezidentlə görüş oldu. Cənab prezident məni o vaxt fərdi təqaüdü ilə təltif etmişdi. O vaxt da prezident bildirdi ki, 3 dəfə dünya çempionu olmaq olimpiya çempionu olmağa bərabərdir” deyə o bildirib.
Hacı Əliyev növbəti hədəflərindən də danışıb.
“Növbəti hədəfim Paris-2024 Yay Olimpiya oyunlarında qızıl medal qazanmaqdır. Ümumilikdə isə Olimpiya oyunlarında iştirak etməyin özü böyük bir uğurdur. Bu dəfə də qatılsam 3-cü dəfə olacaq ki, iştirak edəcəyəm. Yerli idmançılardan 3 dəfə Olimpiya medalı alan idmançımız yoxdur. Medalın, neçənci yerə layiq görülməyimin mənim üçün o qədər də önəmi yoxdur. İdmançı var ki, medal qazanır, idmançı da var ki, tarix yazır. Mən istəyirəm ki, hər dəfə tarix yazım. İdmançılar var ki, uğurlu nəticə qazanırlar, özlərinə şərait yaradıb, idmandan uzaqlaşırlar. Mən də nəsə biznes açıb, başqa sahədə çalışa bilərdim. 2014-cü ildən bu günə qədər mən hər il fərqli nəticələr göstərirəm. Mən həyatımı güləşlə qurmuşam. Nə qədər ki, canım sağlamdır, yeni-yeni qələbələr qazanıb, ölkəmə xidmət edəcəyəm” deyə dünya çempionu bildirib.
Hacı Əliyev ən böyük arzusundan da danşıb.
“Ən böyük arzumdur ki, ölkəmizdə mənim adıma güləş məktəbi yaradılsın. Bilmirəm bu olacaq ya yox? Bunu gələcək göstərəcək. İstərdim ki, o məktəbdə güləşçilər yetişdirim. Çünki hər şey məktəbdən başlayır. İnanıram ki, dövlətimiz tərəfdən nə vaxtsa bu olacaq” deyə idmançı bildirib.(Moderator.az)
Media
