Media
Aİ Şurasının saytında verilən məlumata görə, aprelin 6-da Avropa İttifaqı (Aİ) Şurası Prezidenti Şarl Mişel Azərbaycan Prezidenti İlham Əliyev və Ermənistan Baş naziri Nikol Paşinyanla üçtərəfli görüş keçirəcək.
Siyasi şərhçi Elçin Xalidbəyli Medianews.az saytına keçiriləcək görüşlə bağlı şərh verən zaman bildirib ki, Avropa İttifaqı Şurasının prezidenti Şarl Mişel təmsil etdiyi qurumun adından Azərbaycan və Ermənistan arasında vasitəçilik missiyasını öz üzərinə götürməyə cəhd edir.
Onun sözlərinə görə, əslində, bu, ilk dəfə deyil. Ötən ilin sonlarında da Şarl Mişel Azərbaycan prezidenti İlham Əliyev və Ermənistan baş naziri Nikol Paşinyan arasında görüşün təşkil edilməsinə nail olmuşdu:
“Onu da qeyd etmək lazımdır ki, Brüsseldə keçirilmiş həmin görüşün baş nazir Nikol Paşinyanın xahişi ilə reallaşdırıldığı ilə bağlı da müəyyən məlumatlar mövcud idi. Ancaq Brüssel görüşünün Qərb siyasi dairələrinin qeyri-rəsmi təlimatı ilə Ermənistan baş naziri tərəfindən gündəmə gətirildiyi ehtimal edilirdi.
Görüş ərəfəsində Rusiyanın buna kəskin reaksiya verməsi də həmin məlumatların doğru olduğunu göstərirdi. Kreml tez-tələsik Rusiya prezidenti Vladimir Putinin vasitəçiliyi ilə Moskva görüşünün keçirilməsinə nail olmaqla, Brüssel görüşünü əhəmiyyətdən salmağa çalışdı. Hətta Moskva görüşündə Azərbaycan və Ermənistan bir çox önəmli məsələlər üzrə ciddi anlaşmalar əldə etdiklərindən Brüssel görüşünü formal xarakter daşımış kimi göründü.
Brüssel görüşünə Kremlin belə kəskin reaksiya verməsinin əsas səbəbi isə Qərb siyasi dairələrinin Cənubi Qafqazdakı geopolitik prosesləri, o cümlədən də Azərbaycan və Ermənistan arasında vasitəçilik missiyasını rəsmi İrəvan vasitəsilə Rusiyanın əlindən almaq cəhdləri ilə bağlıydı. Yəni, həm Qərb siyasi dairələri, həm də Ermənistan Azərbaycanla danışıqların Rusiyanın nəzarətindən çıxarılmasında maraqlıdır.
Böyük ehtimalla Şarl Mişelin vasitəçiliyi ilə planlaşdırılan bu görüş də Rusiyanın oyundan kənar vəziyyətə salınmasında növbəti cəhddir. Xüsusilə də, Kremlin başının Ukrayna savaşına qarışdığı bir ərəfədə Qərb siyasi dairələrinin və Ermənistanın Kremli Azərbaycanla danışıqlar prosesindən uzaqlaşdırmaq cəhdləri maraqlı məsələdir. Kremlin buna necə reaksiya verəcəyi də yəqin ki, görüş ərəfəsində ortaya çıxmağa başlayacaq”.
Siyasi şərhçi bildirir ki, görüşdə yəqin ki, Cənubi Qafqazda yaranmış son gərginlik ön plana çıxarılacaq. Böyük ehtimalla Ermənistan baş naziri Nikol Paşinyan Şarl Mişeldən Azərbaycanla sülh sazişinin imzalanması üzrə danışıqlara Avropa qurumlarının vasitəçilik etməsini xahiş edə bilər:
“Son vaxtlara qədər rəsmi İrəvan bu missiyanı ATƏT-in Minsk Qrupunun yerinə yetirilməsinə çalışırdı. Ancaq Minsk Qrupu həmsədrlərinin belə bir səlahiyyətinin olmaması, üstəlik, bu qurumun fəaliyyətini davam etdirməsi üçün də heç bir hüquqi əsasın qalmaması bunu mümkünsüz edir. Ona görə də, Qərb siyasi dairələri və rəsmi İrəvan Rusiyanın prosesdən kənarlaşdırılaraq, əvəzində Avropa İttifaqı Şurasının Azərbaycan və Ermənistan arasında sülh sazişinin imzalanması üzrə danışıqlara vasitəçilik etməsinə cəhd göstərirlər. Böyük ehtimalla görüşün müzakirə gündəliyi də məhz bu mövzular üzərində qurula bilər”.
Leyla
Medianews.az
