Dilarə Əliyeva adına Azərbaycan Qadınlarının Hüquqlarının Müdafiə Cəmiyyəti Regionlarda “Məişət Zorakılığı” təbliğat məişət kampaniyasının təşkili layihəsinə başlayıb. Bu haqda Cəmiyyətin sədri Novella Cəfəroğlu bilgi verib.
Onun sözlərinə görə, layihə Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə həyata keçirilir: “4 ay müddətində həyata keçiriləcək layihə Zaqatala, Balakən, Masallı və Astara rayonlarını əhatə edəcək. Məqsədimiz regionlarda məişət zorakılığına qarşı mübarizəyə dair təşəbbüslərin irəli sürülməsi, “Məişət zorakılığının qarşısının alınması haqqında” Qanunun təbliği və işləmə mexanizmlərinin təkmilləşdirilməsinə təşəbbüs və məişət zorakılığı probleminin ictimailəşdirilməsidir. Eyni zamanda müxtəlif strukturların problemin həlli istiqamətində birgə fəaliyyətlərinin tənzimlənməsi vasitəsilə bu problemlərin aradan qaldırılmasına kömək etmək, iştirakçıların rəylərin toplanması və bu rəylər əsasında tövsiyyələrin hazırlanması da layihənin məqsədidir”.
Layihə rəhbəri bildirir ki, dörd regionun hər birində birgünlük tədbirlər təşkil olunacaq: “Tədbir çərçivəsində Azərbaycanda məişət zorakılığı problemi, onun fəsadları, bu problemin həlli üçün qanunda nəzərdə tutulmuş müddəalar, qanunun tətbiqi mexanizmlərində olan boşluqlar, zorakılığa məruz qalmış insanların hara və necə müraciət etməsində olan çətinliklər, bələdiyyələrin problemin həlli üçün vəzifələri və məsuliyyəti, bələdiyyələrin nəzdində Qadın Otağının təşkili kimi təşəbbüslərdən məlumat veriləcək. Eyni zamanda iştirakçıların fikir və təklifləri müzakirə ediləcək. Tədbirlərdə əhali qrupu? Eyni zamanda zorakılıq qurbanları, onların yaxınları, yerli icra hakimiyyəti, bələdiyyə və icma nümayəndələri, fəal qadınlar, rayonlarda fəaliyyət göstərən vətəndaş cəmiyyətinin nümayəndələri və KİV nümayəndələrinin iştirakı nəzərdə tutulub”.
Düşünürük ki, layihənin həyata keçirilməsi vətəndaşlarımıza “Məişət zorakılığının qarşısının alınması haqqında” Qanununla tanış olmaq, qanunun tətbiq olunması və işləmə mexanizmi barədə rəy bildirmək, təkliflər vermək və bu sahədə olan problemləri müzakirə etmək fürsəti qazandıracaq. Sonda rəy və təklifləri nəzərə alınmaqla təkliflər paketi hazırlanacaq və rəsmi qurumlarla yanaşı donor təşkilata da təqdim olunacaq”.