İllərdir işğalda olan torpaqlarımızı 44 günlük Vətən Müharibəsində igid əsgərlərimizin qanı, canı bahasına azad etdikdən sonra ölkə tarixində yeni dövr başlayıb. Bu dövr hər birimizin böynuna yeni öhdəliklər qoyur. Bu öhdəliklərin ən böyüyü isə istər media, istərsə də diaspora üzrə iş sahəsində olan şəxslərin çiyninə düşür. Çünki yaşananları, 30 illik əziyyəti, həsrəti, 44 günə qaytarılan məğrurluğu bütün dünyaya çatdırmaq hər birimizin borcudur.
Hər zaman eşidirdik ki, “erməni lobbiçiliyi, diasporu güclüdür”, “onlarla heç kim bacara bilməz” və s. Lakin 44 günlük Vətən Müharibəsi zamanı azərbaycanlılar birliyin, həmrəyliyin, vətən sevgisinin nə olduğunu bütün dünyaya sübut etdilər.
Bəs, müharibədən sonra diasporla iş, lobbiçilik sahələrində hansı dəyişikliklər oldu? Bu sahədə yeni addımların təməli qoyuldumu?
“Vikipediya” üzrə mütəxəssis, diaspor üzrə araşdırmaçı-ekspert Elnur Eltürk Medianews.az saytının suallarını cavablandıran zamanı bildirib ki, son illər Azərbaycan diaspor hərəkatında böyük canlanma müşahidə olunur:
“Biz bunu keçirilən tədbirlərdə də görə bilirik. Xaricdə yaşayan və təhsil alan insanlarımız Azərbaycanın diaspor prosesində fəal iştirak edirlər və öz töhfələrini verirlər. Ortada bir reallıq var ki, bu gün yetərincə təşkilatlanmış və öz sözünü deməyi bacaran Azərbaycan diasporu var.
Vətən müharibəsində xaricdə yaşayan Azərbaycan diasporunun fəaliyyəti xüsusi qeyd edilməli və tədqiq olunmalıdır. Həmin vaxt güclü şəkildə təşkilatlanan və düşmənin təxribatlarını mükəmməl səviyyədə qarşısını almağa çalışan Azərbaycan diasporu var idi. Mövcud olan vəziyyət bizi birliyə və həmrəyliyə səsləyirdi. Bunu soydaşlarımız dəqiqliklə və vətənpərvərliklə yerinə yetirirdilər. Həmin zaman siyasi və ideoloji baxışından aslı olmayaraq, hərkəs vətən ideyası ətrafında birləşmişdi”.
Ekspertin sözlərinə görə, bu gün diaspor sahəsində görülən işlərə “ideal və yüksək səviyyədədir” demək olmaz:
“Bunun səbəbləri var. Yəni, biz hansısa hadisələri gözləməməliyik ki, ondan sonra diaspor hərəkətə keçsin. Aktivlik daima saxlanılmalıdır. Mövcud olan potensialı düzgün istiqamətləndirmək və ona stimul vermək üçün real fəaliyyət mexanizmi daima gündəmdə olmalıdır. Xüsusilə, Azərbaycan diasporu xaricdə inteqrasiya olunmalı və ölkənin siyasi-ictimai və sosial-mədəni mühiti ilə daima təmas saxlanılmalıdır. Azərbaycan diasporu yüksək elmi-akademik və siyasi dairələrlə can atmalıdır. Çünki elm adamlarının sözü yüksək dairələrdə eşidilir. Bunun üçün də əsas yol akademik təhsil və ölkənin dilini mükəmməl səviyyədə bilməkdən keçir.
Xaricdə yeni nəsil meydana gəlməkdədir. Onlar orada, yəni xarici ölkədə dünyaya göz açıblar və yüksək təhsil alıblar. Bundan əlavə onlar ağıllı, şüurlu şəkildə inteqrasiya olunmuş bir nəsildir. Qeyd etdiyimiz mövcud olan potensialla çalışmalıyıq”.
Elnur Eltürkün sözlərinə görə, bu sahədə irəliləyiş əldə etmək üçün xüsusilə, nüfuzlu akademik-elmi jurnallarla, siyasi qəzet və saytlarla əlaqələr güclü olmalıdır.
Çünki cəmiyyətə, siyasi dairələrə bu yolla təsir etmək mümkün olacaq və bu zaman biz istədiyimiz nəticəni görə biləcəyik:
“Mədəniyyət sahəsində də fəaliyyət xüsusi diqqətdə olmalıdır. Mədəniyyət xadimləri ilə əlaqələri gücləndirmək lazımdır. Çünki mədəniyyət böyük silahdır. Əsas təbliğat məhz mədəniyyətdən keçir.
Sonda isə onu qeyd edim ki, mən, Azərbaycan diasporunu erməni diasporu ilə müqayisə etməyi düzgün hesab etmirəm. Ermənilər yüz illərdir ki, dünyanın müxtəlif yerlərinə səpələniblər. Təşkilatlanmağa məcbur olublar. Dövləti və vətəni olmayan bir toplumun diaspor yaratması normal haldır. Həm də unutmayaq ki, ermənilər alət olmağı və güclü qüvvələrin qarşısında əyilməyi sevən toplumdurlar”
Leyla
Medianews.az
Məqalə Medianın İnkişafı Agentliyinin onlayn media subyektlərinə (veb-saytlara) maliyyə dəstəyi əsasında hazırlanıb.
İstiqamət: 5.3.14. diaspor quruculuğu, lobbiçilik və dünya azərbaycanlılarının həmrəyliyi;