10920912_806621346086677_5002211929638367499_n

Teleaparıcı Mələk Heydərovanın Milli.Az-a müsahibəsi.

– Mələk xanım, sizi tamaşaçılar çox qısa zaman kəsiyində tanıdılar. Bu gözəl və şirin sima çoxlarının sevimlisinə çevrildi. Bunun sirri nədədir, sizcə?

– Sirrin nədə olduğunu deyə bilmərəm, amma apardığım verilişlər, aktrisa kimi çəkildiyim serial və reklam çarxları ilə tamaşaçıların yaddaşında qalmağı bacardımsa, bu mənim uğurumdur.

– İncəsənət həyatınızda hansı dəyişikliyi etdi? Sərbəst həyat yaşayırsınız, yoxsa qadağalar çərçivəsində?

– Sərbəst olmağına sərbəstəm. Heç kim mənim şəxsi həyatıma müdaxilə etmir. Oraya getmə, bunu geyinmə, onu geyin və s. demir. Amma özüm-özümə müəyyən qadağalar qoyuram, təbii ki.

– Məsələn, spirtli içkilərdən istifadə edirsiniz?

– Qədərində… Sərxoş olacaq dərəcədə içmirəm.

– Bəs geyim tərzinizdə hansı fərqliliklər yaranmağa başladı? Çünki sizi efirdə çox zaman qısa ətəklərdə görürük. Əvvəl də belə geyinirdiniz?

– Məncə, geyindiyim libaslar mənim əynimdə vulqar görünmür. Qısa ətəkləri özümə yaraşdırıram. Bu baxımdan, komplekssiz olaraq onlardan istifadə edirəm.

– Aparıcılığını etdiyiniz verilişlər – “Qadın sözü” və “Kişilər evdə olmayanda” – sırf qadınlarla bağlıdır. Özünüz belə istəmisiniz, yoxsa təsadüfdür?

– Rəhbərliyin məni daha çox bu səpkidə verilişlərə uyğun gördüyü üçün adlarını çəkdiyiniz iki proqramın aparıcılığını eyni anda edirəm.

– Qadın olaraq bu vaxta qədər öz sözünüzü deyə bilmisiniz?

– Hərdən buna məhdudiyyətlər qoyulsa da, bacardığım qədər deyə bilmişəm. Ən azından, buna cəhd göstərmişəm (gülür).

– Bəs kişilər evdə olmayanda nə olur?

– Kişilər evdə olmayanda hər şey yaxşı olur (gülür).

– Mələk xanım, sizcə, mələklər sizdən razı qalırlar?

– Yəqin ki, qalırlar. Çünki heç bir insana pislik etmirəm. Sakit təbiətli biriyəm. Heç kimlə işim yoxdur. Ürəyim yumşaqdır.

– O ürək doludur, yoxsa boş?

– Söhbət sevgidən gedirsə, sevgisiz həyatı təsəvvür edə bilmirəm.

– Konkret olaraq, kimisə sevirsiniz?

– Belə bir şəxs hələ ki, yoxdur. Mən elə bir insanam ki, bir dəfə gördüyüm insana, yaxud da görmədiyim insana platonik olaraq da aşiq ola bilərəm.

– Qadınlar bir arada olarkən oranı qeybətsiz təsəvvür etmək mümkün deyil. Siz də qeybətə vaxt ayıranlardansınız?

– Mən bir o qədər də qeybətə meylli insan deyiləm, amma ola bilər ki, hansısa bir qadının gözəlliyini, geyimini və s. müzakirə edim. O da yaxşı mənada (gülür).

– Belə bir deyim var… Bilmə zəif qadın adın, dərk elə, gör nədir qadın… Sizə görə, qadın necə bir qüvvədir?

– Qadın çox böyük bir qüvvədir. Bunu tarix də sübut edib. Qadın öz ağlı və düşüncəsi ilə çox şeylər edə bilər.

– Feministliyə meyliniz yoxdur ki?

– Qətiyyən. Düzgünlük tərəfdarıyam. Öz cinsimdən olanları tərifləməyim heç də onları bəzi məsələlərdə haqsız olduqları halda müdafiə etməyim anlamına gəlmir (gülür).