Ukrayna prezidenti Volodimir Zelenski sülh danışıqları ilə bağlı kritik qərar verib.
Musavat.com xəbər verir ki, dövlət başçısı Təhlükəsizlik və Müdafiə Şurasının katibi Rüstəm Umerovu ABŞ, digər beynəlxalq tərəfdaşlar və Rusiya ilə aparılacaq danışıqlarda Ukrayna nümayəndə heyətinin rəhbəri təyin edib.
Müvafiq fərman prezidentin rəsmi saytında dərc olunub.
Sənədə əsasən, Rüstəm Umerov “ədalətli və davamlı sülhə nail olmaq məqsədilə” aparılacaq danışıqlarda Ukraynanın əsas təmsilçisi olacaq.
Nümayəndə heyətinin tərkibinə yüksək rütbəli rəsmilər daxil edilib:
- Zelenski ofisinin müşaviri Aleksandr Bevz
- Baş Kəşfiyyat İdarəsinin rəhbəri Kirill Budanov
- Ukrayna Silahlı Qüvvələrinin Baş Qərargah rəisi Andrey Qnatov
- Xarici Kəşfiyyat Xidmətinin rəhbəri Oleg İvaşenko
- XİN rəhbərinin birinci müavini Sergey Kislica
- Təhlükəsizlik və Müdafiə Şurası katibinin birinci müavini Yevgeni Ostryanski
- Təhlükəsizlik Xidmətinin sədr müavini Aleksandr Poklad
- Baş Kəşfiyyat İdarəsi rəis müavini Vadim Kibitski
Xatırladaq ki, bundan əvvəl nümayəndə heyətinə Zelenski ofisinin rəhbəri Andrey Yermak başçılıq edirdi. Lakin o, barəsində aparılan korrupsiya istintaqı çərçivəsində keçirilən axtarışlardan sonra vəzifədən azad olunub.
ABŞ mətbuatının yazdığına görə, Yermakın istefası planlaşdırdığı Vaşinqton səfərindən – prezident Donald Trampın xüsusi elçisi Stiven Uitkoff və ABŞ liderinin kürəkəni Cared Kuşnerlə görüşdən – cəmi bir gün əvvəl baş verib.
“Financial Times” bildirir ki, sülh danışıqları Florida ştatının Mayami şəhərində keçiriləcək.
