Dörd ildir ki, Rəqəmsal İqtisadiyyat Strategiyası müzakirə olunur, amma hələ də təsdiqlənməyib.
Bir dəfə bu haqda yazmışdım ki, adında “rəqəmsal” sözü olan layihələrin qəbulu sanki bir tilsimə düşür, razılaşdırma prosesləri aylarla yox, illərlə uzanır.
Xatırlayıram ki, Rəqəmsal İqtisadiyyat Strategiyasının hazırlanması üzrə İşçi Qrupunun ilk iclası təxminən 3 il əvvəl keçirilmişdi. Bildiyimə görə, 17 dövlət qurumunun təmsil olunduğu bu qrup sənədin hazırlanması ilə məşğul idi.
Strategiyanın qəbulu Prezidentin 22 iyul 2022-ci il tarixli Sərəncamı ilə təsdiqlənmiş “2022–2026-cı illərdə sosial-iqtisadi inkişaf Strategiyası”nın Tədbirlər Planında nəzərdə tutulub.
Lakin artıq 4 ildir “hazırdır”, “təsdiq mərhələsindədir” kimi məlumatlar verilsə də, sənəd hələ qəbul edilməyib. Bu müddət ərzində həm ölkədə, həm də dünyada rəqəmsal sektorda çox ciddi dəyişikliklər baş verib. Bu qədər sürətli transformasiya dövründə adında “rəqəmsal” sözü olan bir sənədin illərlə uzanması doğru yanaşma sayıla bilməz.
Bu gün diqqətimi çəkən bir məqam oldu: İqtisadiyyat nazirinin müavini Sahib Ələkbərov ASAN AI Hub təqdimatında 2026–2029-cu illəri əhatə edən Rəqəmsal İqtisadiyyatın İnkişafı Strategiyasının artıq yekun təsdiq mərhələsində olduğunu bildirdi.
Ümid edirəm ki, ölkədə biznes sektorunda rəqəmsal transformasiyanı sürətləndirməyi hədəfləyən bu sənədin qəbulu yaxın zamanda reallaşacaq.
Osman Gündüz,
Azərbaycan İnternet Forumunun rəhbəri,
Multimedia Mərkəzinin direktoru
