Media
Azərbaycan Dövlət Akademik Opera və Balet Teatrında əsaslı təmir edilir. Əsası XX əsrin əvvəllərində qoyulan tarixi bina təmirdən sonra müasir yeni tikililərə bənzəyir. Tarixi binanın bu şəkildə bərpa olunması sosial şəbəkələrdə heç də birmənalı qarşılanmayıb. Belə ki, binasının yeni görünüşü ilə bağlı müzakirələr və narazılıqlar mövcuddur.
Medianews.az olaraq binanın bərpa işləri ilə bağlı məlumat əldə etməyə çalışdıq.
Belə ki, Opera və Balet teatrının binasının restavrasiyasında iki təşkilat iştirak edir. Binanın interyeri və arxa fasadı Bakı Abadlıq Xidmətinə məxsusdur. Baş fasadı isə “Atelier Erich Pummer GmbH” şirkətinə aiddir. Sözügedən şirkət bir çox tarixi binaların, Qız Qalasının və Məhəmməd məscidinin də təmirində iştirak edib. Sözügedən təşkilat Azərbaycanda memarlıq abidələrinin bərpası ilə məşğul olan yeganə şirkətdir və monopol olaraq fəalliyyət göstərir. Sosial şəbəkələrdə qınağa səbəb olan tarixi binanın rənginə isə şirkət özü qərar verib və bu barədə memarlarla müzakirə aparmayıb.
Bununla bağlı Medianews.az-a şirkətin ölkəmizdəki nümayəndəliyi müdirinin müavini Çingiz Neymanzadə açıqalama verib.
O bildirib ki, bu məsələ barədə sosial şəbəkələrdə aparılan müzakirələr əsassızdır:
“Sual vermək istərdim ki, insanlar hansı əsasla sosial mediada narazılıq edirlər? Bunun üçün hansı faktı əsas gətirirlər?
Opera və Balet Teatrının görünüşü heç bir tarixi sənədlərdə öz əksini tapmayıb. Bərpa işlərinə başlayan zaman biz bu məsələ haqqında uzun müddət araşdırma apardıq. Lakin tarixi abidənin görünüşünü əks etdirən heç bir sənəd əldə edə bilmədik. Bərpa işlərini başlamaq üçün tarixi fotoları topladıq. Həmin şəkillər əsasında analiz edərək binanın rənginə qərar verdik. Çünki öncə mövcud olan rəng onun özünə aid deyildi.
Qeyd edək ki, bizim şirkət hər hansı tarixi binaların yox, yalnız tarixi abidələrin bərpasında iştirak edir. Qız Qalası, Məhəmməd Məscidi, Bəylər Məscidi və digər bir çox abidələrin restevrasiyasında bizim əməyimiz var”.
Çingiz Neymanzadə bildirir ki, şirkət bərpa işlərinə başlayanda sifarişçinin tələbləri əsasında bu prosesi həyata keçirir:
“Tarixi abidələrin bərpa işləri sirafişçinin istəyi əsasında aparılır. Sifarişçi kimdirsə, o bütün lazımi sənədləri bizə təhvil verir. Bu məsələ isə Azərbaycanda artıq böyük bir problemə çevrilib. Tarixi sənədlərdə binanın dəqiq təsviri və əvvəlki görünüşü əks olunmadığından bərpa prosesi olduqca çətinləşir. Təbii ki, sifarişçi şirkətin qarşısına müəyyən tələblər qoyur. Hər bir sifarişçi bu tələbləri daxili bədii, arxitektor şurası ilə müzakirə əsasında müəyyənləşdirir. Bizim şirkət həmin tələblər əsasında bərpa işlərinə başlayır. Biz bu prosesi özbaşına həyata keçirmirik”.
Medianews.az
