Media
“Ermənistan və Azərbaycan arasında yaxın müddət ərzində sülh sazişinin imzalanması gözlənilmir”.
Bu sözləri Medianews.az-a sülh sazişi ilə bağlı danışan siyasi şərhçi Elçin Mirzəbəyli bildirib.
Ekspert deyir ki, bu barədə fikirlər səsləndirilsə də, Ermənistan dövlətinin atdığı addımlar sülh müqaviləsinin imzalanmasına hər hansı bir əsasın olmadığını göstərir:
“Azərbaycan və Ermənistan arasında yaxın müddətdə hər hansı sülh sazişinin imzalanması ilə bağlı konkret bir mövqe yoxdur. Bu barədə ümumi fikirlər səsləndirilir. Son olaraq Ermənistanın baş naziri Nikol Paşinyanın Avropa parlamentində səsləndirdiyi fikirlər və paralel olaraq sülh sazişindən bəhs etməsi əslində bir-biri ilə ziddiyət təşkil edirdi.
Paşinyan Qarabağı tərk edən erməni sakinləri barədə öncə bildirmişdi ki, burada onlara qarşı heç bir təzyiq göstərilməyib. Lakin daha sonra o, Avropa Parlamentində tamamilə əks fikirlər səsləndirdi. Belə davranışlar sülh sazişinin imzalanması üçün heç bir əsasın olmadığını göstərir və bir daha sübut edir ki, Ermənistan rəhbərliyi qərbli qardaşlarının ev sahibliyi etdiyi tədbirlərdə daha çox sülhpərvər görünməyə, Azərbaycanı isə sülhə meyilli olmamaqda israrla ittiham etməyə cəhd göstərir. Bu aspektən sülh sazişinin qısa zaman ərzində imzalanacağı ilə bağlı fikir səsləndirmək çox çətindir”.
Siyasi şərhçi qeyd edir ki, Ermənistan prosesə üçüncü tərəfləri cəlb etmək niyyətindədir:
“Konteksdə olan ikinci məsələ isə Fransanın bu prosesdə iştirakı ilə bağlıdır. Bu yaxınlarda Ermənistanla Fransa arasında imzalanan sazişə əsasən, Fransa Ermənistana 3 ədəd “GM200” radarı, həmçinin zenit raket kompleksi vermək niyyətindədir. Həmin silahlar isə region dövlətlərinin, İran, Rusiya, Gürcüstanın ərazisindən keçməklə Ermənistana çatdırılacaq. Qonşu ölkələr öz növbəsində hərbi təyinatlı yüklərin ərazilərindən keçməsinə şərait yaratmamalıdırlar. Düşünürəm ki, Ermənistan bununla bölgəyə xarici qüvvələri cəlb etmək niyyətindədir.
Ermənistanın sülh prosesinə zidd addımlar atması, bölgəyə yad təsirləri cəlb etməsi bir daha bu ölkənin missiyasının nədən ibarət olduğunu göstərir. Bu dövlət nəyin bahasına olursa-olsun sülh sazişinin regional kontekstdə imzalanmasını istəmir.
Azərbaycan tərəfi danışıqların, müzakirə və dialoqların Gürcüstanda olmasını təklif edir. Lakin Ermənistan bu prosesə Fransa və Almaniyanı üçüncü tərəf olaraq daxil etmək istəyir. Bu isə Ermənistan üçün əlavə təminat deməkdir. Həmin addım bölgə dövlətlərinin maraqlarına uyğun deyil.
Bütün hallarda biz ötən zaman kəsiyində ATƏT-in Minsk qrupu həmsədrlərinin timsalında regiondan kənar iki oyunçunun proseslərə necə ziyan vurduğunun şahidi olmuşuq. Nəticə etibarilə, fərqli maraqların kəsişdiyi nöqtədə heç bir uğur əldə olunmadı və daha ciddi problemlərin yaranmasına zəmin formalaşdı.
Ermənistan tərəfi nə qədər ki, bu missiyanı dəyişə bilmirsə, hansısa sülh sazişinin imzalanmasından söz açıla bilməz”.
Aytac Şahin
Medianews.az
