Media
Misli Premyer Liqasının 9-cu turunda “Səbail” “Qəbələ” nin qonağı oldu. Görüş “dənizçilər”in 1:0 hesablı qələbəsi ilə başa çatdı. Yeganə qolu son dəqiqələrdə vuran “Səbail”in qələbəsində pay sahibi olan Yusif Nəbiyev matçdan sonra Fanat.Az-ın əməkdaşının da suallarını cavablandırıb.
“74 nömrə”nin müsahibəsini təqdim edirik:
– Ardıcıl qələbələrlə turnir cədvəlinin yüksək pillələrindəsiniz… Məsuliyyət yükü ağır deyilmi?
– Əlbəttə, futbolçu olaraq bu, bizdə əlavə məsuliyyət yaradır. Amma biz bir məsələdə rahatıq ki, rəhbərlik qarşımıza avrokuboklara vəsiqə tələbi qoymayıb. Biz növbəti oyunu fikirləşirik.
– Oyunun gedişinə baxsaq, sanki “Səbail” bir xal qazanmaq istəyirdi. Son dəqiqələrdə vurulan qolun sizə sürpiriz üç xal olduğunu deyə bilərik?
– Bəli, oyun gərgin mübarizə şəraitində keçdi. Bərabərlik ədalətli nəticə ola bilərdi. Amma bu, futboldur. Onlar vura bilmədilər, biz vurduq. Futbolda yazılmamış bir qanun var: Vurmayana vurarlar. Buna görə sevincliyik.
– Milli komandaların oyunları ilə əlaqədar yaranacaq fasilə formada olan “Səbail” ə mənfi təsir edə bilərmi?
– Məncə, xeyr. Bundan öncə də qələbələrimiz arda-arda gəldi, sonra fasilə oldu. Adətən biz elə fikirləri yaxın buraxmaq istəmirik. Çünki peşəkar futbolçularıq, o barədə düşünməsək, daha yaxşı olar.
– Milliyə çağrılmaq ehtimalını necə dəyərləndirirsən?
– Sözün açığı, dəvət etsələr, şad olaram. Çağırmasalar, pis olmayacam, çünki mən cavanam, yaşım azdır. İştirak etməyimi istəsələr, canla, başla gedib vəzifəmi yerinə yetirəcəm.
– Qardaşının oyununu izləyirsən. Fərid “Turan Tovuz”da sanki “Kəpəz”dəki oyununu göstərə bilmir. Yəqin ki, arada söhbət edirsiniz…
– Hə, qardaşımın oyununu izləyirəm. Bir-birimizlə hər gün danışırıq. Onlar yeni komandadır. Ayxan müəllimin oyun fəlsəfəsi fərqlidir. Müəyyən zaman lazımdır. Çünki onların da yeni transferləri var. Adaptasiya məsələsi həlledicidir.
