Media
Çox zaman səki ilə gedərkən, avtomobil idarə edərkən və ya yolu keçdikdə ətrafımızdakı avtomobillərdən yüksək səsli musiqi sədaları eşidirik. Bəzi sürücülər, xüsusilə gənclər, meyxana, ritmik mahnılar səsləndirir, maşının isə pəncərələrini açıq qoyub, ətrafdakılara maneçilik törədirlər. Onlar bu addımla sanki özlərini təsdiq etdiklərini düşünür. Hətta bununla yekunlaşmayıb səs ucaldıcılardan, siqnallardan istifadə etməkdən belə çəkinmirlər. İnsanlar belə vəziyyətdən şikayətlənsələr də, həmin sürücülər üçün bunun əhəmiyyəti olmur.
Məsələ ilə bağlı Referans.az-a danışan Baş Dövlət Yol Polis İdarəsinin inspektoru, polis leytenantı Elvin Hacıyev bildirib ki, bu barədə hər hansı bir cərimə yoxdur, lakin bəzi hallarda tədbirlər görülə bilər:
“Bu barədə hər hansısa bir inzibati cərimə yoxdur. Əgər yüksək səs ətrafdakı insanları narahat edəcək şəkildədirsə, mənzillərdə, yaşayış evlərinin girişlərində və həyətlərində, küçələrdə, istirahət yerlərində və digər ictimai yerlərdə gecə vaxtı saat 24-dən 7-dək səs-küy salmağa, ucadan mahnı oxumağa, musiqi alətlərini ucadan ifa etməyə, televizorları, radioqəbulediciləri, maqnitofonları və digər aparatları gur səslə oxutmağa, məişət səs-küyünə qarşı mübarizə tələblərini başqa üsulla pozmağa görə inzibati qaydada tədbir görülə bilər”.
Elvin Hacıyev qeyd edib ki, avtomobilində musiqiyə qulaq asan şəxs kənardakı inasanları narhat edirsə, bu kimi hallarla qarşılaşan vətəndaşlar ərazi üzrə Post Patrul əməkdaşlarına müraciət etməlidir və həmin şəxs barəsində tədbir görülməlidir.
