Media
Bakının Abşeron rayonu Novxanı kəndinin sakinləri uzun müddətdir kanalizasiya problemi yaşayırlar.
Bu müraciətlə “Qafqazinfo”ya sözügedən kəndin V.Axundov küçəsinin sakinləri müraciət edib.
Müraciətdə qeyd olunur ki, onların yaşadığı küçədə kanalizasiya xətti olmadığı üçün uzun müddətdir “şambo” sistemindən istifadə edirlər. Məlumata görə, əvvəl “şambo”dan çirkab suları çəkmək mümkün olsa da, son illərdə bu, mümkünsüz olub.
Kənd sakinlərinin sözlərinə görə, çirkab sular artıq onların yaşadığı evin altına dolur və bu da vəziyyəti dözülməz hala çatdırır. Problemin həlli ilə bağlı aidiyyəti qurumlarlara müraciət etsələr də, onlara hər hansı cavab verilməyib. Sakinlərin bildirdiyinə görə ərazidən foto çəkib göndərə bilmirlər. Buna səbəb çirkab sularının evin altına dolması və ərazidə gözlə görünən bir şey olmadığıdır.
Məsələ ilə əlaqədar “Qafqazinfo”nun sorğusuna “Azərsu” ASC-dən cavab olaraq bildirilib ki, Novxanı qəsəbəsində mərkəzləşdirilmiş kanalizasiya sistemi mövcud olmadığından qurum həmin ərazidə tullantı sularının axıdılması xidmətlərini göstərmir: “Həmin ərazilərdə kanalizasiya şəbəkəsinin yaradılması üçün ilk növbədə daşıyıcı kollektorlar inşa edilməli və sonra tikiləcək şəbəkələr həmin kollektorlara qoşulmalıdır. Bununla bağlı layihələr hazırlanıb. Abşeron yarımadasının qəsəbələrində mərhələlərlə kanalizasiya layihələri icra olunur”.
