Qurban Qurbanov: “Böyük riskə getdik, alınmadı”

“Oyunun sonlarında böyük riskə getdik, alınmadı”.

Bunu “Qarabağ”ın baş məşqçisi Qurban Qurbanov Bakı Olimpiya Stadionunda Polşanın “Rakuv” klubu ilə 1:1 hesablı heç-heçə etdikləri UEFA Çempionlar Liqasının II təsnifat mərhələsinin cavab oyunundan sonra mətbuat konfransında deyib.

51 yaşlı mütəxəssis ilk görüşdəki 2:3 hesablı məğlubiyyətin əvəzini çıxa bilmədikləri üçün məyus olduqlarını bildirib: “Təəssüf ki, cütün məğlubu olduq. Amma çox maraqlı oyun oldu. Meydanda hər şey var idi. Hər iki komanda bir-birini çox yaxşı analiz etmişdi. Xüsusən də, heç kim digərinə oynamaq imkanı vermədi. İkinci hissədə üstünlük bizim tərəfimizdə oldu. Xeyli sayda qol epizodlarımız oldu. Azarkeşlərimizə təşəkkür etmək istəyirəm. Bu gün sanki meydanda futbolçularla birlikdə idilər. Futbolçular bu gün çox əziyyət çəkdilər. Demək olar ki, 10 nəfərlə rəqibin cərimə meydanında idik. Hətta uduza da bilərdik. Çünki rəqibin təhlükəli əks-hücumları olurdu. Hamımız məyusuq. Bu oyunu tez bir zamanda geridə qoyub, qarşıdakı görüşə hazırlaşmalıyıq”. (Report)