“Qarabağ”ın rəqibini yaxından tanıyaq

“Qarabağ”ın UEFA Çempionlar Liqasının 1-ci təsnifat mərhələsindəki rəqibi olan Cəbəllütariq “Linkoln”u 1976-cı ildə yaradılıb.

“Cırtdan” ölkə təmsilçisi İngiltərənin “Linkoln Siti” klubunun şərəfinə bu cür adlandırılıb.

Ləqəbi “qırmızı iblislər” olan komanda ev oyunlarını 5 000 tamaşaçı tutumuna malik “Viktoriya” stadionunda keçirir.

1981/1982 mövsümündən yüksək liqada çıxış edən “Linkoln” 27 dəfə Cəbəllütariq çempionu olub və bu göstəricidə ölkə rekordçusudur.

“Linkoln” 2003-2016-cı illərdə – ardıcıl 14 dəfə öz ölkəsinin çempionu olub. 2016/17 mövsümündə isə dünya rekordunun bir addımlığında olub (rekord Vanuatunun “Tafea” klubuna məxsusdur). Amma sonuncudan əvvəlki turda xal itirib və titulu, beləliklə həm də dünya rekordçusu olmaq imkanını əldən verib.

Klub UEFA reytinqində 197-ci pillədədir.

“Linkoln”un prezidenti Dilan Viaqasdır. Kollektivə ispaniyalı mütəxəssis Xavi Munyos rəhbərlik edir. Komandanın kapitanı isə Roy Çipolinadır.