Cümə axşamı, 18 İyul 2024

“Space TV” efirindəki söyüşə görə cəzalandırıldı – VİDEO

Bu gün Audiovizual Şuranın videoformatda iclası keçirilib.

Medianews.az  “Qafqazinfo”ya istinadən xəbər verir ki, iclasda Şuranın apardığı monitorinqlər nəticəsində aşkarlanmış “Media FM” radio kanalının efirində “Reklam haqqında” Qanunun, “Space TV” televiziya kanalının efirində isə “Media haqqında” Qanunun tələblərinin pozulması faktları müzakirə olunub.

Belə ki, ümumölkə yerüstü radio yayımçısı olan “Digital Media” MMC-nin “Media FM” radio redaksiyasının efirində 11 may tarixində saat 08:48-də, 15 may tarixində saat 08:50-də, 09:49-da və 12:50-də “Reklam haqqında” Azərbaycan Respublikası Qanununun 29.5-ci maddəsinin tələbinin (hamiləliyin süni yolla pozulması və süni mayalanma üzrə tibbi xidmətin reklamı qadağandır) pozulması faktları qeydə alınıb.

Bundan başqa, ümumölkə yerüstü televiziya yayımçısı olan “Space Müstəqil Televiziya və Radio Şirkəti” MMC-nin “Space TV” televiziya redaksiyasının efirində 12 may tarixində “Gəl, danış” proqramının yayımı zamanı (saat 13:01-də) “Media haqqında” Azərbaycan Respublikası Qanununun 14.1.6-cı maddəsinin tələbinin (əxlaqdankənar leksik (söyüş) məzmunlu söz və ifadələrdən, jestlərdən istifadəyə yol verilməməlidir) pozulması faktı aşkarlanıb.

Şura üzvləri aparılan müzakirələrdən sonra hər iki redaksiyaya qarşı yayımın dayandırılması sanksiyasının tətbiq olunmasına yekdilliklə səs verib.

Audiovizual Şuranın qəbul etdiyi müvafiq qərarlara əsasən, “Media FM” radio redaksiyasının proqramlarının yayımı 21 may 23:00-24:00 arası 1 saatlıq, “Space TV” televiziya redaksiyasının proqramlarının yayımı 21 may 08:00-11:00 arası 3 saatlıq dayandırılacaq.

DAHA ÇOX OXU

Xəbər lenti