Media
ABŞ İsrailə İranın hərəkətlərinə cavab vermək üçün birgə hərbi planlar barədə təklif göndərib.
Bu barədə “Axios” portalı məlumat yayıb.
Məlumata görə, bu, ABŞ və İsrail arasında hərbi əməkdaşlığın əhəmiyyətli inkişafına səbəb olacaq görünməmiş təklifdir. Bu fikirlər ABŞ Silahlı Qüvvələrinin Birləşmiş Qərargah Rəisləri Komitəsinin sədri, general Mark Milley və ABŞ Mərkəzi Komandanlığının rəhbəri general Maykl Kurillanın İsrailə son səfərləri zamanı Tel-Əvivin diqqətinə çatdırılıb.
Bununla belə, burada söhbət İrana qarşı hər hansı zərbənin planlaşdırılmasından getmir.
Tərəflər İranla bağlı müxtəlif fövqəladə hallar zamanı planlar mübadiləsi aparacaq və Tehranın regiondakı fəaliyyəti ilə bağlı yaranan müxtəlif vəziyyətlərdə necə davranmağı müzakirə edəcəklər.
Portal qeyd edir ki, iki həftə əvvəl ABŞ-ın milli təhlükəsizlik üzrə müşaviri Ceyk Sallivan Vaşinqtonun Yaxın Şərq Siyasəti İnstitutunda çıxışı zamanı İsraili narahatlığa əsas olmadığına inandırmağa çalışıb.
“Biz açıq şəkildə bildirdik ki, İranın nüvə silahına malik olmasına heç vaxt icazə verilməyəcək. ABŞ Prezidenti Cozef Baydenin dəfələrlə dediyi kimi, o, bu məqsədə çatmaq üçün lazımi tədbirləri görəcək, o cümlədən İsrailin fəaliyyət azadlığını tanıyacaq”, – Sallivan bildirib.
