Media
“Dönər+ayran 1 manat”
Yuxarıda yazılan təklifə şəhərin əksər yerlərində fəaliyyət göstərən dönərxanalarda rast gəlmək mümkündür.
Maraqlıdır, toyuq ətinin kiloqramı 6-7 manat, ətin isə 14-15 manat olduğu təqdirdə necə olur ki, istehlakçılara bu qiymətlərdə dönər təklif edilir?
Məsələ ilə bağlı Azad İstehlakçılar Birliyinin sədri Eyyub Hüseynov Medianews.az-a verdiyi açıqlamada qeyd etdi ki, yeganə çıxış yolu dönər satılan yerlərdə mütamadi monitorinqlərin həyata keçirilməsidir:
“Azad İstehlakçılar Birliyi olaraq, biz vətəndaşın hər hansı bir malı ucuz almasının tərəfdarıyıq. Lakin həmin malın keyfiyyətli olması da vacibdir.
Dönərlər artıq cəmiyyətin böyük bir bəlasına çevrilib. AQTA-da ictimai şuranın üzvü olduğum zamanlarda dəfələrlə bu məsələni qaldırmışam. Çünki dönərxanalarda ciddi monitorinqlər aparılmalıdır. Hansı dönərxanaya gedib müşahidə aparsaq, orada malların mənşəyini göstərən kağızlar görə bilərik. Bu kağızlarda isə guya istifadə edilən məhsulların rəsmi yerdən alınması və heç bir qanun pozuntusunun olmadığı göstərilir. Lakin heç kəs o kağızın həmin obyektə hazırlanan dönərə aid olduğunu sübut edə bilməz. Azərbaycanda hazırlanan dönərlərin mənfi cəhəti ondan ibarətdir ki, ətlərin çöl tərəfi qovrulur, içinə isə yavaş-yavaş istilik daxil olur. Belə olan zaman çiy ətdən axan plazma siniyə tökülür. Həmin plazmada isə heyvanlara aid olan xəstəliklər üçün vurulan antibiotiklər toplanır. Daha sonra dönərə qatılan ətlər də bu sinidə qarışdırılır. Sözügedən hal normal qiymətə satılan dönərlər üçün də təhlükəlidir.
Biz uzun illərdir murdar ət biznesini izləyib, həmin müddət ərzində bütün bölgələrdə bu halların yaşanmasını müşahidə etmişik. Bu sahədə ən uğurlu işi Daxili İşlər Nazirliyinin Baş Mütəşəkkil Cinayətlərə qarşı Mübarizə idarəsi görür. Onlar belə halları ifşa və cərimə etməklə qalmır, eyni zamanda bu prosesə daxil olan şəxslərə qarşı cinayət işi qaldırır və həbslər həyata keçirir. Ancaq məhkəmələrdə onlara çox qısa vaxt ərzində bəraət verilir. Bu paradoksu isə biz anlaya bilmirik. Həmin hallar DİN-in bu şəxslərə qarşı gördüyü tədbirləri də sıfıra endirir. Çünki murdar ət biznesi ilə məşğul olan adamlar azadlığa çıxdıqdan sonra yenidən bu əmələ əl atırlar. Sözügedən biznesin davam etməsi isə ona tələbin olmasıdır. Tələb isə qanunsuz fəaliyyətlə məşğul olan dönərxanalardadır.
Yeganə çıxış yolu dönərxanalarda monitorinqlərin aparılmasıdır. Aparılan müşahidələrin nəticəsində həmin obyektlərə xüsusi nişan verilməlidir ki, orada həqiqətən də qanuni yolla kəsilən ətlərdən istifadə olunur.
Dönərxanalarda hökm sürən vəziyyət Azərbaycan istehlakçılarını acınacaqlı nəticələrlə üz-üzə qoyur. Burada ən böyük məsuliyyət AQTA-nın üzərinə düşür. Mövcud problemlə mübarizə aparmaq üçün həmin qurum mütləq şəkildə monitorinqlərə başlamalı və bu proses olduqca şəffaf həyata keçirilməlidir. Biz tərəfdarı deyilik ki, dönərxanalar birdəfəlik bağlansın. Sadəcə istehlakçıların həyatını təhlüləyə atmamaq üçün daha keyfiyyətli mallardan istifadə etmək vacibdir”.
Həmin məsələ ilə bağlı olan suallarımızı Azərbaycan Respublikasının Qida Təhlükəsizliyi Agentliyinə də ünvanladıq. Qurumdan Medianews.az-a verilən açıqlamada bildirildi ki, bununla bağlı müvafiq monitorinqlər aparılır:
“AQTA tərəfindən müxtəlif qida məhsulları, o cümlədən, ölkə ərazisində fəaliyyət göstərən dönərxanalarda yoxlamalar davam etdirilir. Dönər məhsullarından nümunələr götürələrək Azərbaycan Qida Təhlükəsizliyi İnstitutunun müvafiq labaratoriyalarında müayinələrə cəlb olunur. Labarator müayinələr nəticəsində uyğunsuzluq aşkarlanan müəssisələrlə bağlı qanunvericiliyə uyğun olaraq müəyyən tədbirlər görülür. Qida təhlükəsizliyi ilə bağlı bütün hallar agentlik tərəfindən ciddi nəzarətdə saxlanılır. Vətəndaşlarımızdan xahiş edirik ki istehlak etdikləri dönər məhsulları ilə bağlı əgər onlarda şüphə yaranarsa, eləcə də uyğunsuzluq müşahidə edərlərsə, AQTA-nın 1003 Çağrı Mərkəzinə müraciət etsinlər”.
Aytac Şahin
Medianews.az
