“Mənzillərin ucuz olmasına səbəb bu binalar toplu şəkildə şirkətlərdən götürülür və həmin gündən təyin olunmuş qiymətlə vətəndaşlara təqdim olunur. Əmlak bazarında qiymət nə qədər qalxsa da, bu layihənin ilkin təqdim etdiyi qiymətlər olduğu kimi qalır”.
Bu sözləri Medianews.az- a əmlak məsələləri üzrə ekspert Elnur Fərzəliyev bildirib.
Əmlak eksperti qeyd edir ki, indiyə qədər 3 mindən çox mənzil vətəndaşlara təqdim edilib:
“İpoteka və Kredit Zəmanət Fondu 2020 -ci ildən başlayaraq paytaxtın müxtəlif ərazilərində, çoxmənzilli yaşayış binalarının satmaq öhdəliyi ilə kirayə yoluyla vətəndaşlara təqdim edir. Bu gün belə layihələrə maraq həddən artıq çoxdur. Çünki ərazi üzrə təklif olunan mənzillərə və həmin mənzillərin kirayə qiymətlərinə baxsaq, digər binalarda bu tip mənzillər baha qiymətə təklif olunur və kirayə verilir. Hansı ki, vətəndaş uzun illər orada qalsa da, yanlız kirayə qalır. Ancaq bu layihədə əsas motiv ondan ibarətdir ki, vətəndaşlar pulu öz mənzilləri üçün ödəsinlər və sonda mənzil vətəndaşın özünə qalsın. Bu tip binalar tam təmirli, çıxarışla təmin olunub. Həmin mənzillərdə yaşamaq üçün hər bir imkan yaradılıb. Yəni, vətəndaş öz şəxsi əşyasını götürüb yaşaya bilər”.
Elnur Fərzəliyev vurğulayır ki, aylıq qiymətlərə nəzər salsaq, mənzillərin ucuz olduğunu görürük:
“Tələb olunan şərtlər digər kredit şərtlərindən daha asandır. Belə layihələrdən istənilən peşə sahibləri, hətta ailə üzvləri xaricdə yaşayan, gəlir əldə edən və əldə etdiyi gəliri rəsmi formada göstərə bilirsə, bu ailənin üzvləri də bu tip layihələrdən yararlana bilir.
Mərkəz ərazilərdə kreditlə satılan evlərin aylıq ödənişləri həddən artıq çoxdur. Xüsusən də ipotekaya yararlı köhnətipli yaşayış binalarında iki otaqlı mənzillərin qiyməti 120 min manatdan, 3 otaqlı mənzillər isə 150 min manatdan başlayır. Yeni tikili binalarda 1 otaqlı təmirli, çıxarışlı mənzillərin satış qiymətləri 120 -180 min manat arası dəyişir. Həmçinin bu xətt üzrə otaq sayı artdıqca qiymətlər də artır. Bu tip mənzilləri ipoteka yolu ilə əldə edən şəxslər daha çox ödəniş etməli olurlar. Ona görə də bu layihə şəffaf və əlçatandır.
2013 – cü ildən bu yana tikilmiş binaların hər biri adiyyatı üzrə tikildiyi zaman dövlət qurumları tərəfindən yoxlanılıb və normativlərə uyğun formada tikildiyi təsdiqlənib.
Belə layihələrin sayı çox olarsa, kirayədə yaşayan vətəndaşlar üçün ev almaq şansı daha böyük olar. Arzum budur ki, yaxın gələcəkdə bu layihələrin sayı artsın. Digər şəxslər də bu cür mənzillərdən yararlana bilsinlər”.
Mehin Mehmanqızı
Medianews.az