Novruz bayramına sayılı günlər qalıb. Türk dünyasında böyük sevinclə qarşılanan bu bayram Azərbaycanda xüsusi qeyd edilir.
Bəs bayramda necə qidalanmalıyıq ki, sağlamlığımıza zərər gəlməsin?
Dietoloq Lalə Babayeva Medianews.az – a bildirib ki, qədim bayramlarımızdan olan Novruzda süfrələrimiz gözəlliyi ilə göz oxşayır:
“Zəngin və bol çeşidli təamlarımız bayramı daha da gözəlləşdirir.
Bayram günləri günə 2 stəkan ilıq su içməklə başlamaq lazımdır. Yeməklərin arasında 4 saat fasilə vermək lazımdır. Bəzən bol çeşidli təamlarımızın qəbulu insan orqanizmində müxtəlif fəsadlara səbəb olur.
Xüsusi ilə qan -damar, şəkər xəstələri bayram günlərində olduqca diqqətli olmalıdırlar.
Yüksək kalorili şirniyyatlar şəkər xəstələrinin səhhətində ciddi problemlərə yol aça bilər. Çünki normadan artıq şəkər qəbul etmək mədəaltı vəzdə problemlər yaradır.
Ümumiyyətlə yüksək kalorili şirniyyatlar, yeməklərin qəbulu bədəndə mədə və bağırsağın yüklənməsinə səbəb olur. Bu da ciddi problemlərə gətirib çıxarır. Şirniyyat məhsullarını günün birinci yarısında yemək daha məsləhətlidir. Çünki normadan artıq şəkərin qəbulu mədəaltı vəzə ziyandır. Şirniyyatı çay ilə tükətmək düzgün deyil”.
Dietoloq onu da qeyd edib ki, çay, kofenin miqdarını azaltmaq, onları bitki çayı ilə əvəz etmək daha yaxşı olar:
“Yaxşı olar ki, bayram süfrəsində qızardılmış qidalara deyil, sobada bişmiş yeməklərə üstünlük verilsin. Qazlı içkiləri masada göyərti, kefir, qatıqla əvəz etmək daha yaxşı olar. Həmçinin. təzyiq ve şəkər xəstəliyindən əziyyət çəkən insanlar günün ikinci yarısında maye qəbulunu minimala endirməlidirlər. Bayram ərəfələrində yemək sonrası fiziki aktivliyi artırmaq daha yaxşı olar. Bol yürüş etmək , alınan kaloriləri yandırmağa kömək edəcək.
Bayram sonrası bədəni təmizləmək – Detox etmək daha yaxşı olar.
Bol su içmək, yürüyüş etmək, masaj, qara çaydan imtina etməklə detoxa başlaya bilərsiz. Detoxu 1 həftə davam edə bilərsiniz. Bu 1 həftə ərzində karbohidratı, proteini minimala endirmək daha faydalı olar. Meyvəni günün 1-ci yarısında qəbul etmək daha məsləhətlidir. Günün 2-ci yarısında daha çox tərəvəz salatlarına üstünlük vermək lazımdır. Hər saat başı 1 stəkan su qəbul etmək daha yaxşı nəticə verə bilər”.
Mehin Mehmanqızı
Medianews.az