Media
Martın 11-də Muğam Mərkəzində Beynəlxalq Qadınlar Gününə həsr olunmuş “Milli və müasir dəb. Azərbaycan qadınının üslubu və hekayəsi” adlı seminar keçirilib.
Medianews.az xəbər verir ki, Bakı Milli Geyim Evinin direktoru, modelyer-dizayner Könül Vəlibəylinin rəhbərliyi və təşəbbüsü ilə keçirilən seminarda sənətşünas Günel Seyidəhmədli, stil məsləhətçisi, geyim psixoloqu Rəna Melech, dəb stilisti Orxan Rəhimov, dəb illustrasiya təlimatçısı Xəyalə Məsimova, dəb eskizçisi Aytac Aslanlı, Avropa Dizayn Mərkəzinin (“European Design Center”) tələbələri, geyim dəbi ilə maraqlananlar iştirak edib.
Seminarı giriş sözü ilə açan Könül Vəlibəyli rəhbərlik etdiyi mərkəzin fəaliyyətindən söz açaraq, bildirib:
“Bakı Milli Geyim Evi Azərbaycan milli geyimləri, onların tarixinin dünyada tanınması, təbliği yolunda bir çox işlər görüb. 15 il ərzində mərkəzimiz demək olar ki, dünyanın bütün ölkələrində keçirilən sərgilərdə iştirak edib.
Bizim həm də Avropa Dizayn Mərkəzi (“European Design Center”) kimi bir tədris ocağımız da var, hansı ki, burada geyim dizaynerinə aid nə varsa tədris olunur. Həmçinin mərkəzimizdə ingilis, italyan və digər Avropa dilləri kursları keçirilir”.
Könül Vəlibəyli daha sonra Azərbaycan qadınının geyim üslubundan, onun tarixindən söz açıb:
“Milli geyimlərimiz çox əsrlik tarixə malikdir. Azərbaycan qadını hər zaman dəblə ayaqlaşmağa çalışıb, gözəlliyinə, səliqəli geyinməyə, stilinə, makiyajına diqqət edib.
Ancaq çox arzulayıram ki, hər bir Azərbaycan qadını gözəl, dəbli görünməklə yanaşı həm də təhsilli, savadlı olsun, hansısa peşəyə sahiblənsin, öz tələbatlarını ödəmək üçün özü qazansın, heç kimdən maddi asıllığı olmasın”.
Sənətşünas Günel Seyidəhmədli isə çıxışında milli geyimlər, onların formalaşması, müasir modada sənaye mərkəzlərindən söz açıb:
“Fransız dizayner Kristian da bildirirdi ki, yanlış olaraq dəbi varlılığın göstəricisi kimi təqdim edirlər, əslində isə dəb, dünyagörüşün, səlistliyin, rahatlığın, simvolun özüdür.
Bəs moda nədir? Moda mədəniyyətdə zövqün müvəqqəti hakimiyyəti deməkdir. O, müəyyən bir zaman kəsiyində formalaşır və keçici xarakter daşıyır. Yəni, şıltaqdır, bəzən geriyə dönmə xüsusiyyəti olur”.
Modelyer, rəssam Xəyalə Məsimova isə qeyd etdi ki, muasir texnologiyanın inkişafı moda sahəsinə öz təsirini göstərməkdə davam edir:
“Bura ən son texnologiya olan digital sketch nümunə göstərmək olar. Geyimləri digital platformada, hazır olduqda olan görüntüsünə qədər müştəriyə təqdim etmək mümkündür. Bu rahatlıq yaradıcılıq dünyasında müsbət qarşılanır. Üstünlükləri vaxt qənaəti, modeli tikilmədən görmək və təqdim etmək, istənilən şəraitdə və mühitdə işləmək imkanıdır. Bu xüsusiyyətlər hazırda, digital sketchi digər üsullardan daha effektiv olmağa kömək edir”.
Həmçinin digər iştirakçılar da geyim, moda psixologiyasına söz açıb, keçmiş və müasir dəbin xüsusiyyətlərini müzakirə ediblər.
Daha sonra seminar iştirakçıları Avropa Dizayn Mərkəzinin (“European Design Center”) tələbələri, moda və dizayner həvəskarlarını maraqlandıran sualları cavablandırıblar. Mərkəzin tələbələri bir neçə ay ərzində öyrəndiklərindən danışıb, öz təəssüratlarını bölüşüblər.
Sonda Bakı Milli Geyim Evinin direktoru, modelyer-dizayner Könül Vəlibəyli bildirib ki, mərkəz davamlı olaraq bu cür seminarlar təşkil edib, dəfilələr keçirəcək. O, qeyd edib ki, nəinki paytaxtda yaşayan xanımlarımız, eyni zamanda ölgələrdə yaşayan Bakıya gələ bilməyən ancaq peşə- sənət öyrənmək istəyən xanımlarımıza da xidmət göstərirlər. Belə ki, onlar onlayn dərslər tədris etməklə bölgələrdə yaşayan, paytaxta gələ bilməyən xanımlarımıza bu sənətin sirlərini öyrədirlər.
