Media
Bu gün əsas problemlərdən biri də fəaliyyət göstərən taksi sürücülərinin ödənişi sərnişindən nəğd tələb etməsidir. Kartla ödəniş olduğu halda nə üçün sürücülər nəğd pul tələb edir ? Ödənişin kartla yox, nəğd tələb olunması nə dərəcədə doğrudur?
Məsələ ilə bağlı Medianews.az- a danışan nəqliyyat məsələləri üzrə ekspert Eldəniz Cəfərov bildirib ki, bu gün Azərbaycanda kifayət qədər özünün taksi qarajı, ştat işçiləri olan taksi şirkətləri var:
“Bununla yanaşı taksi operatoru şirkətləri də var ki, onlarla işləyən taksi sürücüləri üçün müştəri tapıb onun müqabilində pul alırlar. Eyni zamanda fərdi qaydada taksi fəaliyyəti ilə məşğul olan vətəndaşlarımız da var. Taksi operatoru şirkətləri mütləq qaydada vətəndaşların qeyri- nəğd ödəmələrini həyata keçirməsinə şərait yaratmalıdır. Sürücü taksi şirkətləri ilə əməkdaşlığa başlamazdan öncə onların qarşısında belə bir şərt qoyulur ki, kartla da ödəniş həyata keçiriləcək.Taksi operator şirkətlərinə qoşulan şəxs razılaşır. Lakin sonrakı mərhələdə şahidi oluruq ki, taksi sürücüsü kartla ödəniş etmək istəyən vətəndaşa narazılığını bildirir və imtina edir. Hətta təqqirəlayiq ifadələr işlədir. Sonda isə vətəndaş mənzil başına çatanda ya bankomatdan pul çıxarmalı olur, ya da yaxınından alıb ödənişi etməli olur. Bunlar taksi sürücüsünün qeyri – qanuni əməlləridir. Biz təbii ki, taksi sürücüsünü ittiham etmirik. Lakin taksi sürücüsü fəaliyyətə başlayanda kartla ödənişə əvvəl razılaşıb, sonradan razılaşmayacaqsa, bu qanun pozuntusudur. Bu “İstehlakçıların hüquqlarının müdafiəsi” haqqında qanun pozuntusudur. Həmin qanuna əsasən vətəndaşlarımıza bildirmək istəyirik ki, ilkin mərhələdə sövdələşmədə kartla ödəniş varsa, sərnişin kartla ödəniş etmək istəyirsə, taksi sürücüsü isə nəğd pul tələb edirsə, bu zaman sərnişin nəğd pulu ödəməyə bilər. Bu məsələlərin həllini tapmaması taksi fəaliyyətini tənzimləyən qrumların bu sahədə addım atmaması və yaxud da atmaq istəməməsidir”-, deyə fikrini bildirib.
Mehin Mehmanqızı
Medianews.az
