El Salvadorda açılan həbsxananın dərc olunan fotoları son günlər dünyanın gündəminə çevrilib.
Medianews.az xəbər verir ki, ən qorxunc cinayətkarların yerləşdiyi həbsxanada Mara Salvatruça kartelinin də olduğu öyrənilib.
Dünyanın ən amansız kartellərindən biri olan dəstəyə qoşulmaq üçün edilənlər insanı şoka salır.
Təxminən 7 milyon əhalisi olan Mərkəzi Amerika ölkəsi El Salvador Latın Amerikası ölkələri arasında ən yüksək cinayət nisbətinə malikdir. 25 oktyabr 2019-cu ildə El Salvadorda heç kim öldürülməyib. Dəstələrə qarşı müharibə elan etdiyini açıqlayan El Salvador lideri Nayib Bukele sosial media hesabından “Oktyabrın 25-i bütün ölkədə sıfır cinayətlə bağladığımızı təsdiqləyə bilərik. Allaha şükür” mesajını paylaşmışdı.
Koronavirusun dünyanı bürüdüyü günlərdə El Salvadorda bir gündə 22 nəfər qətlə yetirildi. Nayib Bukele 2020-ci ilin aprelində məhbuslara bir günlük təknəfərlik kamera cəza verdi. Yüzlərlə məhkum çılpaq şəkildə kameralara yerləşdirildi. Dünyada sensasiyaya səbəb olan bu hadisənin oxşar görüntüləri iki ildən sonra təkrarlanıb. 2022-ci ilin mart ayında, cümə, şənbə və bazar günləri 87 qətl törədildikdə polis küçələrdə insan ovuna başlayıb.
Nəzarətə alınan şübhəlilər yenidən yalnız alt paltarları ilə həbsxanaya aparılıb. Yenidən “fövqəladə vəziyyət” elan edən Nayib Bukele həbsxanaları giriş-çıxış üçün bağlayıb və həbsxanadakı dəstə üzvlərinə iki gündən bir yemək verilməsini əmr edib.
“Cinayətə qarşı müharibə” apardığını deyən Salvador lideri Bukele, ələ keçirilən dəstə üzvlərinin saxlanması üçün Şimali və Cənubi Amerikada ən böyük həbsxananın tikintisini öz üzərinə götürüb. Beynəlxalq xəbər agentliyi Agence France-Presse (AFP) xəbər verir ki, ilk cinayətkarlar dəstəsi 40 min məhbus tutumu olan meqa həbsxanaya köçürülüb.
Nayib Bukele Twitter hesabında yazıb ki, səhər tezdən qısa adı CECOT olan həbsxanaya bir əməliyyatla 2000 məhbus köçürülüb. “Bura onların yeni evi olacaq” deyən Bukele həbsxanadan video görüntülər də paylaşıb. Video görüntülərdə məhbusların ayaqyalın, yalnız ağ alt paltarı geyindikləri, döymələri və başları qırxılmış şəkildə əks olunub.
1970-ci illərdə Los-Ancelesdə qurulan və şeytana sitayiş etdiyi bilinən “Mara Salvatrucha” bandasının da ‘meqa həbsxanada’ həbsxanada olduğu öyrənilib. Dəstənin dünya üzrə 80 000-ə qədər üzvü olduğu, təkcə ABŞ-da 10 000-ə qədər aktiv üzvü olduğu düşünülür. 1990-cı illərin əvvəllərində üzvləri Los-Ancelesdən qovulduqdan sonra dəstə El Salvadorda qərargah yaradıb. Mara Salvatrucha insan alveri, reketçilik, qətl, çirkli pulların yuyulması, adam oğurluğu, soyğunçuluq, qeyri-qanuni immiqrasiya, hücum və fahişəlik də daxil olmaqla, dünya üzrə müxtəlif qeyri-qanuni vasitələrlə pul qazanır.
Amansız kartelə qoşulmaq üçün müəyyən şərtlər tələb olunur. Kartel liderinə öz sərtliyini və əxlaqsız hərəkətlər etmək istəyini sübut etməli olan namizədlər də dəhşətli “təcavüz” rituallarına dözməli olurlar. Dəstəyə qoşulmaq istəyən kişilər çox vaxt şiddətli döyülmələrə dözməli olurlar, bəzən də kimisə öldürmələri tələb olunur. İştirak etmək istəyən qadınlar üçün vəziyyət çox acınacaqlıdır. Döyülmə və zorlama yolu ilə sınaqdan keçən qadınlar imtahandan keçsələr, kartelin üzvü olurlar.
Dəstənin qadın üzvlərindən biri olan Elena Quzman 2017-ci ildə Pacific Standard jurnalına demişdi ki, sevimli qadın üzvlərin cinsi təcavüzə məruz qalma ehtimalı daha çoxdur.
Nəhayət, bir neçə il əvvəl dəstənin El Salvadorda sarışın və qırmızı saçları qadağan etdiyi müəyyən edilib. Bu iki rəngdən yalnız dəstə üzvlərinin rəfiqələrinin istifadə edəcəyi açıqlanıb. Bildirilib ki, kartel üzvləri sözügedən qadağanı pozanları zorlayacaqlar. Lakin Salvador qadınları təslim olmadılar. Kollektiv aksiyada bütün qadınlar saçlarını bu rəngə boyadılar və karteli geri addım atmağa məcbur etdilər.
Qeyd edək ki, El Salvador onilliklərdir ki, dəstə müharibələrinin bitmədiyi bir ölkədir. Salvadorun cinayətkar dəstələri ilk olaraq 1980-ci illərdə vətəndaş müharibəsi başlayandan sonra Salvadorlu mühacirlərin uşaqları Los-Ancelesə gəlmək üçün ölkələrini tərk etdikdə yaranıb. Müharibə 1992-ci ildə başa çatdı və bir çoxları öz ölkələrinə qayıtdılar. Ancaq geri qayıdanda özləri ilə Los-Ancelesin banda mədəniyyətini gətirdilər.
Medianews.az