Media
“Ərəb dünyası yeni informasiya texnologiyaları imkanlarını genişləndirir. İnformasiya texnologiyaları sahəsinə və infrastruktura sərmayəni genişləndirməklə regionun media sənayesində sürətli dəyişikliklər edilir”. Bu fikir “Səudiyyə Media Forumu 2” konfransında səsləndirilib.
Medianews.az kaspi.az-a istinadən xəbər verir ki, forumun sessiyalarında Səudiyyə Ərəbistanının energetika naziri, şahzadə Əbdüləziz bin Salman bin Əbdüləziz, media və ticarət naziri Məcid bin Abdullah Al- Qəssabi, investisiya naziri Xalid Al- Falih də iştirak ediblər.
Səudiyyə Ərəbistanının energetika naziri, şahzadə Əbdüləziz bin Salman bin Əbdüləziz medianın cəmiyyətdə rolundan danışaraq rəhbərlik etdiyi nazirliyin media sektorunda çalışanlarının sayının bu il iki dəfə artırılacağını söyləyib: “Həqiqəti əks etdirən media başqalarının sizi necə gördüyünü bilmək üçün güzgü ola bilər. Bu, işin inkişafına təkan verər”.
Səudiyyə Ərəbistanının investisiya naziri Xalid Əl-Falih qeyd edib ki, neftlə bağlı olmayan yeni sektorların və iqtisadiyyatların qurulması onun rəhbərlik etdiyi nazirliyin əsas prioritetidir: “Krallığın iqtisadi inkişaf planı da buna əsaslanır”.
Səudiyyə Ərəbistanının ticarət və media naziri vəzifəsini icra edən Məcid bin Abdullah Al-Qəssabi bildirib ki, bu sahədə icra olunan layihələr və təşəbbüslər media sənayesində mövcud olan, problem yaradan halları təqdim etmək üçün media və biznes peşəkarları arasında da rəqabəti təşviq edir: “Biz hamımız daha yaxşı media gələcəyinə nail olmağa can atırıq”.
Xatırladaq ki, forum ərəb və dünya ölkələrinin media sənayesi rəhbərlərini, ekspertləri və KİV nümayəndələrini, həmçinin rəsmi şəxsləri bir araya toplayıb. Səudiyyə Jurnalist Assosiasiyası ilə Səudiyyə Yayım Orqanının birgə təşkilatçılığı ilə baş tutan forumda 1500-ə yaxın nümayəndə iştirak edir. Fevralın 20-21 də keçirilən tədbirdə beynəlxalq ekspertlər medianın inkişafına yönəlik təcrübələri paylaşır, müzakirələr aparılır, sektorun qarşılaşdığı çətinliklərin aradan qaldırılması üçün həll yolları təklif olunur.
