Media
“F-16-ların alınması üçün iki ölkənin NATO üzvlüyünü şərtləndirmək düzgün olmaz”.
Medianews.az xəbər verir ki, bu sözləri Türkiyənin xarici işlər naziri Mövlut Çavuşoğlu dünən ABŞ-nin dövlət katibi Antoni Blinken ilə görüşü zamanı bildirib.
Türkiyənin F-16 tələbi ilə bağlı son vəziyyəti müzakirə etdiklərini qeyd edən Çavuşoğlu bir sıra məqamlara toxunub:
“ABŞ administrasiyası tələbimizə güclü dəstək verir. Arzu edirik ki, bu məsələ ilə bağlı Konqresə tez bir zamanda rəsmi məlumat verilsin… Biz Konqresin maneəsini deyil, dəstəkləyici rol oynamasını gözləyirik. Düşünürəm ki, ABŞ administrasiyası qətiyyətli mövqe tutsa və Konqresdə birgə işləyə bilsək, bunun öhdəsindən gələ bilərik. İki müstəqil məsələnin, xüsusən də iki ölkənin NATO-ya üzvlüyünü şərtləndirmək düzgün və ədalətli olmaz. İki fərqli mövzudur. Ona görə də ikisini bir yerdə düşünmək doğru yanaşma deyil. Yaxud şərtlərdən asılı olaraq, onsuz da bizim F-16 almağımız mümkün olmayacaqdı… Məncə, Türkiyə və ABŞ administrasiyasının bu məsələdə ortaq mövqe sərgiləməsi mümkündür”.
Türkiyənin ortaq olduğu F-35 proqramından çıxarıldığına diqqət çəkən Çavuşoğlu, “Bu, birtərəfli qərar idi. Ona görə də Türkiyə bu proqramda olmadığı üçün ödədiyimiz 1,4 milyard dolların geri qaytarılmasını gözləmək bizim ən təbii haqqımızdır. Bu məsələ ilə bağlı danışıqlar davam etdirilir”, – deyə bildirib.
Aytac Şahin
Medianews.az
