Media
Ermənistan xarici işlər naziri Ararat Mirzoyanın Türkiyəyə səfərinin daha bir detalı bəlli olub.
Bu barədə məlumatı “Past” qəzeti yayıb. Məlumata görə, Ankarada Mirzoyana açıq şəkildə bildirilib ki, Azərbaycanla Ermənistan, eləcə də Ermənistanla Türkiyə münasibətlərinin nizamlanmasına mane olan əsas faktorlardan biri qondarma rejimin dövlət naziri Ruben Vardanyandır.
Qəzet öz mənbələrinə istinadən Mirzoyanın görüşdə Türkiyə tərəfinə birbaşa Baş nazir Nikol Paşinyanın adından vəd verdiyini bildirib. Belə ki, Mirzoyan Çavuşoğluna tezliklə Ruben Vardanyan məsələsini həll edəcəklərini söyləyib.
Qeyd edək ki, Mirzoyan Ankaraya bir neçə gün öncə səfər edib. Məhsuldar keçən səfərdən sonra Mirzoyan Türkiyə ilə konkret razılıqlara gəldiyini bildirib. Ermənistan Baş naziri Nikol Paşinyan da Mirzoyanın səfərindən məmnun olduğunu bildirib.
Diqqət çəkən məqam səfərdən bir gün öncə İrəvanın Bakının sülh təkliflərinə cavab yollaması olub. Bundan sonra parlamentdə partiyasının deputatları ilə gizli görüş keçirən Paşinyan onlara Azərbaycanla bu il ərzində sülh müqaviləsini imzalamağa çalışacaqlarını deyib.
