Media
Norveç Müdafiə Nazirliyi iddia edib ki, Rusiya Hərbi Dəniz Qüvvələrinin döyüş gəmiləri 30 ildə ilk dəfə taktiki nüvə silahı ilə təchiz edilib.
Nazirlik tərəfindən Norveç hərbi kəşfiyyatının topladığı məlumatlarla hazırlanan Fokus 2023 adlı illik hesabatda Rusiyanın taktiki nüvə silah tutumunun əhəmiyyətli bir hissəsinin Şimal Donanmasındakı döyüş gəmilərində istifadə edildiyi iddia edilib:
“Adi döyüş qabiliyyəti zəifləyən Rusiya üçün nüvə silahının əhəmiyyəti nəzərəçarpacaq dərəcədə artıb” ifadəsi verilən hesabatda bu vəziyyətin NATO ölkələri üçün danılmaz təhlükə yaratdığı irəli sürülüb.
Hesabatda nüvə silahlarının Şimal Donanmasında sualtı və suüstü gəmilərə yerləşdirildiyi iddia edilib.
Qərargahı Murmansk vilayətinin Severomorsk şəhərində yerləşən Şimal Donanmasının gəmilərinin son soyuq müharibədə nüvə silahı ilə yerləşdirildiyi də diqqətə çatdırılıb.
Bunlara əlavə olaraq hesabatda Rusiya donanmasının peyk əleyhinə silahlara, kiberhücum proqramına və sualtı infrastrukturları təxribat etmək üçün qurğulara malik olduğu da iddia edilib.
Norveç mərkəzli xəbər saytı Barents Observer 2017-ci ildəki xəbərlərində Şimal Donanmasının əsaslarının yerləşdiyi Kola körfəzində 5 fərqli nöqtədə Rusiyanın nüvə silahı anbarlarının təsbit edildiyini iddia edib.
ABŞ-ın oktyabr ayında paylaşdığı məlumata görə, Rusiya ordusunda 2000-ə yaxın taktiki nüvə başlığı var.
Medianews.az
