Media
Kahramanmaraşda 10 vilayətdə dağıntılara səbəb olan 7,7 və 7,6 bal gücündə iki zəlzələdən sonra dünyanın hər yerindən xilasetmə qrupları Türkiyəyə yardım edir. Eyni zamanda bir çox müxtəlif ölkələrdə ianə kampaniyaları təşkil edilir.
Medianews.az xəbər verir ki, zəlzələdən sonra Türkiyəyə xilasetmə qrupları göndərən Pakistan da, yük maşınları və təyyarələrlə zəlzələ bölgəsinə humanitar yardım etməyə davam edir.
Zəlzələ qurbanlarına 30 milyon dollar yardım edən bir pakistanlı iş adamı dünya mətbuatının gündəminə düşüb.
Qeyd olunur ki, iş adamı olduğu deyilən şəxs zəlzələ qurbanlarına 30 milyon dollar bağışlayaraq yoxa çıxıb. Həmin şəxsin kimliyi barədə hələlik məlumat yoxdur. Lakin onun pakistanlı iş adamı olduğu bildirilir.
Son məlumata görə, ABŞ-da yaşayan adı isə açıqlanmayan pakistanlı Türkiyənin Vaşinqtondakı səfirliyinə gələrək zəlzələ qurbanları üçün 30 milyon dollar bağışlayıb. Həmin şəxs yardım etdikdən sonra səssizcə səfirliyi tərk edərək yoxa çıxıb.
Sözügedən Pakistan vətəndaşının etdiyi yardımla bağlı Pakistanın baş naziri Şahbaz Şərif “twitter”də paylaşım edib: “Adı açıqlanmayan bir pakistanlı Türkiyənin ABŞ-dakı səfirliyinə gedərək Türkiyə və Suriyada zəlzələdən zərər çəkənlərə 30 milyon dollar bağışlaması məni duyğulandırdı. Bu addım, bəşəriyyətin aşılmaz kimi görünən çətinliklərini dəf etməyə imkan verən belə şərəfli xeyriyyəçilik hərəkətlərinin bariz nümunəsidir”.
Medianews.az
