Türkiyənin zəlzələ bölgəsində təxminən 26 nəfər Azərbaycan vətəndaşı ilə bağlı məlumat yoxdur. Onların axtarışları aparılır.
Bunu Modern.az-a açıqlamasında Azərbaycanın Türkiyədəki Səfirliyinin mətbuat katibi Aygün Qocayeva bildirib.
“İndiki vəziyyətdə 26 nəfər Azərbaycan vətəndaşından məlumat almaq mümkün olmayıb. Vətəndaşlarla əlaqənin qurulmaması o demək deyil ki, onlar vəfat ediblər. Sadəcə əlaqə qurma imkanları olmaya bilər. Hazırda axtarışlar davam edir”,- deyə səfirlik rəsmisi vurğulayıb.
Qeyd edək ki, bir neçə gün öncə Türkiyənin zəlzələ bölgəsinə səfər edən Azərbaycanın xarici işlər naziri Ceyhun Bayramov hələ də tapılmayan vətəndaşlarımızın olduğunu demişdi. Lakin həmin şəxslərin sayını açıqlamamışdı.
Xatırladaq ki, bu günə qədər 5 nəfər Azərbaycan Respublikası vətəndaşının – 1980-ci il təvəllüdlü Bünyatova Nailə Aydın qızı, 1973-cü il təvəllüdlü Məmmədova (Ökten) Rəna Xudaverdi qızı, 1975-ci il təvəllüdlü Məmmədova Sevinc Eldar qızı, 1976-cı il təvəllüdlü Karlı Leyla Vahid qızının və 1974-cü il təvəllüdlü Həsənzadə İlahə Hüseynağa qızının vəfatı barədə məlumat əldə olunub.