Hatayda zəlzələdə dağılan binanın dağıntıları altında qalan Ayaz və bacısı Ece Su köməkçi qruplar tərəfindən gecə saatlarında xilas edilib. Həmin anlar kameralara əks olunarkən uşaqları xilas edən məmurun “Kaş mənim övladlarım da xilas ola” sözləri ürək ağrıdıb.
Medianews.az xəbər verir ki, Kahramanmaraşda baş verən 7,7 və 7,6 bal gücündə zəlzələlərdən sonra ANDA qrupları AFAD ilə koordinasiyalı şəkildə bölgədə axtarış-xilasetmə işlərinə başlayıb.
Hatayda çalışan qruplar gecə saatlarında Ayaz və bacısı Ece Sunu çökən binanın dağıntıları altından xilas ediblər. Şaxtalı soyuqda qısaqol köynəkdə görünən Ayaz və böyük bacısı Ece Su ilk ambulator müayinələrdən sonra xəstəxanaya aparılıb. 2 qardaşın xilas edildiyi anlar mobil telefonun kamerasına əks olunub.
Ece Su dağıntılar altından çıxarılarkən su istəməsi və daha sonra “Qorxuram, çıxa bilmirəm” dediyi anlar görüntülərdə yer alıb. Digər tərəfdən uşaqları bayıra çıxaran məmurun “Kaş mənim övladlarım da xilas ola” deməsi ürək ağrıdıb. Bu sözlərdən sonra digər rəsmilər “Amin, inşallah” deyiblər.